«Լիլի» ռեստորանի սեփականատիրոջ սպանությունը բացահայտվեց

Այս տարվա հունվարի 29-ին՝ ժամը 12:30-ի սահմաններում, Նոր Խարբերդում` Երևան-Արտաշատ խճուղուն կից «Լիլի» հարսանյաց հանդիսությունների սրահում, երեք կրակոցով սպանվել էր սրահի սեփականատեր Գրիգոր Խաչատրյանը: Փաստի առթիվ ոստիկանության Արարատի մարզի քննչական բաժնում հարուցվել էր քրեական գործ:

Այսօր արդեն գործը փոխանցվել է ՀՀ ոստիկանության քննչական գլխավոր վարչության հատուկ կարևորագույն գործերով քննության վարչություն: Այս մասին հաղորդագրություն է տարածել ոստիկանության մամլո ծառայությունը՝ հիշեցնելով դեպքը:

Վրեժ Հովհաննիսյանի ազգականներն այս ամբողջ ընթացում չէին էլ թաքցրել վրեժ լուծելու իրենց մտադրությունը: Քննությանը հայտնի է, մասնավորապես, որ ասվել էր այսպիսի խոսք. «Նրանք մեր լավին են տարել, մենք էլ նրանց լավին ենք տանելու»: Նկատի էին ունեցել հենց Գրիգոր Խաչատրյանին, որը ոչ միայն հեղինակություն ու հարգանք էր վայելում Այնթապում, այլև պարբերաբար օգնություն էր ցույց տվել «Արչո» մականունով Վրեժ Հովհաննիսյանի սպանության համար դատապարտված Կարապետ Խաչատրյանին ու նրա ընտանիքին:

Այս ընթացքում, սակայն, ձեռք բերվեցին նոր տվյալներ, ի հայտ եկան նոր կասկածյալներ: Ձեռնարկված օպերատիվ-հետախուզական և քննչական միջոցառումների արդյունքում քրեական հետախույզների օպերատիվ տեսադաշտում հայտնվեցին Արմավիրի մարզի Արևաշատ գյուղի բնակիչ,` 1970 թվականին ծնված, նախկինում երկու անգամ դատապարտված Հարություն Ասատրյանը և Էջմիածնի բնակիչ` 1983 թվականին ծնված Արթուր Հակոբյանը: Միջոցառումներով պարզվեց, որ Գրիգոր Խաչատրյանի սպանության օրը` հունվարի 29-ին, Հարությունը Բագրատաշենի անցակետով հատել էր Հայաստանի սահմանը ժամը 20.59-ին: Արթուր Հակոբյանը նույն տեղով սահմանը հատել էր փետրվարի 1-ին` ժամը 19.59-ին: Հանրապետությունից հեռանալու հանգամանքն ավելի խորացրեց կասկածները: Պարզվեց նաև, որ սպանությանը նախորդող օրերին Արթուր Հակոբյանը հանդիպել է «Արչոյի» եղբայր Կամո Հովհաննիսյանի հետ:

Արթուր Հակոբյանն ու Հարություն Ասատրյանը որոշ ժամանակ անց վերադառնում են Հայաստան ու նույն պահից ընկնում ոստիկանների օպերատիվ հսկողության տակ: Իսկ հանգուցալուծումը սկսվում է ապրիլի 25-ին: Արթուր Հակոբյանը «Արչոյի» եղբայր Կամոյին հանդիպելիս նրանից ստացել էր ատրճանակ, նաև համապատասխան վճար` սպանությունը կազմակերպելու և իրականացնելու համար: Հետո Հարություն Ասատրյանը, Արթուր Հակոբյանն ու Հայկ Ասատրյանը վերջինիս անձնական օգտագործման «ՎԱԶ-2107» ավտոմեքենայով մի քանի օր շարունակ դարանակալում են նախ Խաչատրյանի տան, ապա նաև հանդիսությունների սրահի մոտ` ճշտում են Խաչատրյանի տեղաշարժը և ծրագրում անելիքը:

Քննչական փորձարարության ընթացքում Արթուր Հակոբյանն ու Հարություն Ասատրյանը մանրամասն ներկայացրին հունվարի 29-ին կատարվածը: Նույն մեքենայով գալիս են Այնթապ: Հայկ Ասատրյանը մեքենան կայանում է հարսանյաց սրահից քիչ հեռու և մնում մեքենայում: Հարություն Ասատրյանն ու Արթուր Հակոբյանը մոտենում են սրահին, դարանակալում ու սպասում: Համոզվելով, որ Գրիգոր Խաչատրյանը մնացել է մենակ, մտնում են նրա աշխատասենյակ, որտեղ էլ Հարություն Ասատրյանը իր մոտ եղած ատրճանակով կրակոցներ է արձակում Խաչատրյանի ուղղությամբ, ինչից հետո դիմում են փախուստի: 

Մանրամասները` police.am-ի տեսանյութում: