Սպանվել է ''Լիլի'' ռեստորանի սեփականատերը

Հունվարի 29-ին` ժամը 13.20-ին, ոստիկանության Մասիսի բաժնում հիվանդանոցից հաղորդում են ստացել, որ մարմնական վնասվածքներով բուժօգնության է տեղափոխվել 1965 թ. ծնված Գրիգոր Խաչատրյանը. հայտնում են ոստիկանությունը:

Մեկնած օպերատիվ խումբը պարզել է, որ նույն օրը` ժամը 13.00-ի սահմաններում, Նոր Խարբերդ գյուղում գտնվող մի հարսանյաց սրահում անհայտ անձը հրազենով 3 անգամ կրակել է Գրիգոր Խաչատրյանի վրա: Գ. Խաչատրյանը տեղափոխվել է հիվանդանոց, որտեղ նույն օրը` ժամը 13.40-ի սահմաններում, մահացել է:

Ձեռնարկվում են միջոցառումներ անհայտ անձին հայտնաբերելու ուղղությամբ: Ոստիկանության Արարատի մարզի քննչական բաժնում ՀՀ քրեական օրենսգրքի 104 հոդվածի 1-ին մասի և 235 հոդվածի 1-ին մասի հատկանիշներով հարուցվել է քրեական գործ: Կատարվում է նախաքննություն:

Շրջանառվող տեղեկությունների համաձայն` Գրիգոր Խաչատրյանին է պատկանում «Լիլի» ռեստորանային համալիրը և Այնթափ գյուղում գտնվող հարսանյաց սրահը: