Չորս ուժերը Հովիկ Աբրահամյանին են փոխանցել կուտակայինի հարցով իրենց նախագիծը

ՀՀ վարչապետ Հովիկ Աբրահամյանը դուրս եկավ չորս ուժերի հետ քննարկման սենյակից ՀՀԿ խմբակցության ղեկավար Գալուստ Սահակյանի, փոխվարչապետ, տարածքային կառավարման նախարարի պաշտոնակատար Արմեն Գևորգյանի, ՀՀԿ-ական պատգամավորներ Վարդան Այվազյանի ու Խոսրով Հարությունյանի ուղեկցությամբ: Նրանք խորհրդակցությունը շարունակեցին առանձին:

Հովիկ Աբրահամյանը նշեց, որ լրագրողների բազմաթիվ հարցերին պատասխանելու է ասուլիսում, որը կհրավիրի կառավարության վերջնական ձևավորումից հետո, ուստի մի քիչ պետք է սպասել: Նա միայն նշեց, որ չորս ուժերի հետ քննարկվել է կուտակայինի հարցը: Չորս ուժերն իրեն են փոխանցել կուտակայինի հարցով իրենց նախագիծը, որը պետք է քննարկի կառավարությունը:

Հարցին՝ ի՞նչ եք զգում նոր պաշտոնում, պատասխանեց. «Իրավունք և պատասխանատվություն»: Լրագրողներից մեկի հարցին՝ «իսկ Ձեր ասածների հանդեպ», Հովիկ Աբրահամյանը պատասխանեց. «Ես իմ բոլոր ասածներին տեր եմ»:

Նշենք, որ չորս ուժերի քննարկումը դեռ շարունակվում է: