Խաչիկյանի գործով երրորդ վկան է մահացել

Սոցիալական ապահովության պետական ծառայության նախկին պետ Վազգեն Խաչիկյանի և 12 նախկին աշխատակիցների գործով ամբաստանյալ Հովհաննես Գրիգորյանի առողջական վիճակը վատթարացել է: Այս մասին այսօր Կենտրոն և Նորք-Մարաշ վարչական շրջանների ընդհանուր իրավասության դատարանում` գործով հերթական նիստի ժամանակ հայտարարեց նախագահող դատավոր Արշակ Վարդանյանը` վկայակոչելով «Դատապարտյալների հիվանդանոց» ՔԿՀ-ից ստացված համապատասխան գրությունը: Այդ իսկ պատճառով դատավորը որոշեց հետաձգել դատական նիստը:

Հիշեցնենք, որ նախորդ դատական նիստում դատավորը մերժել էր հիշյալ ամբաստանյալի պաշտպան Արա Զաքարյանի` դատավորին ինքնաբացարկ հայտնելու միջնորդությունը` անհիմն լինելու պատճառով:

Այսօրվա նիստին դատակոչվել էր 26 վկա, որոնցից ներկայացել էին 7-ը: Ինչպես պարզվեց վկաներից Նարեկ Զախարյանը մահացել էր: Նշենք, որ այս գործով անցնում է 190 վկա, որոնցից արդեն հարցաքննվել են 125-ը:

Ի դեպ, շուրջ մեկուկես տարի տևած դատաքննության ընթացքում արդեն 3-րդ վկան է մահանում:

Հիշեցնենք, որ Խաչիկյանին մեղադրանք է առաջադրվել կազմակերպված խմբով` յուրացման եղանակով 211.680.984 ՀՀ դրամ և խարդախությամբ` 29.000.000 դրամ գումարներ հափշտակելու, ինչպես նաև պաշտոնեական կեղծիք կատարելու համար: