Ինքնաբացարկ` Խաչիկյանի գործով 3-րդ դատավորին

Քիչ առաջ Սոցիալական ապահովության ծառայության նախկին պետի` Վազգեն Խաչիկյանի գործով նորանշանակ դատավոր Արշակ Վարդանյանը մտավ խորհրդակցական սենյակ` ամբաստանյալ Հովհաննես Գրիգորյանի պաշտպան Արա Զաքարյանի` իր դեմ ներկայացված ինքանաբացարկի միջնորդությունը քննարկելու համար:

Ըստ պաշտպանի` հիշյալ դատավորը անհիմն կերպով մերժել է իր պաշտպանյալին գրավի դիմաց ազատ արձակելու միջնորդությունը` պատճառաբանելով, որ մտավախություն կա, որ ամբաստանյալը կթաքնվի քննությունից: Արա Զաքարյանը մտավախություն հայտնեց, որ դատավորը ցանկանում է շարունակել գործի քննությունը` առանց հետազոտելու նախկին դատավորի` Պապոյանի կողմից հետազոտված ապացույցները: Ըստ փաստաբանի` նման դատավորը չի կարող անկողմնակալ քննել գործը:

Դատավորը որոշումը կհրապարակի քիչ անց:

Հիշեցնենք, որ Արշակ Վարդանյանը Խաչիկյանի գործով 3-րդ դատավորն է: Առաջին դատավորը` Մխիթար Պապոյանը, գործը հանձնել էր Մեսրոպ Մակյանին այլ դատարանում աշխատանքի անցնելու կապակցությամբ: Մակյանն էլ, իր հերթին, ինքնաբացարկ էր հայտնել` նշելով, որ ամբաստանյալ Խաչիկյանն իր համակուրսեցին է: