3 միլիոն 143 հազար դրամ՝ երեք համայնքում ընտրական ծախսերի համար

Կառավարության' ապրիլի 10-ի նիստի օրակարգում ընդգրկված է ՀՀ 3 տարբեր համայնքներում համայնքի ղեկավարի, դրանցից մեկում նաեւ ավագանու արտահերթ ընտրություններ անցկացնելու ծախսերը հոգալու համար միջոցներ տրամադրելու որոշման նախագիծը:

Ըստ այդմ' արտահերթ ՏԻՄ ընտրություններ պետք է անցկացվեն Լոռու մարզի Յաղդանի, Արագածոտնի մարզի Արագածի և Գեղարքունիքի մարզի Այգուտի գյուղական համայնքներում, իսկ Յաղդանում' նաև ավագանու արտահերթ ընտրություներ: Բոլոր համայնքներում միասին ընտրությունները կազմակերպելու և անցկացնելու համար կպահանջվի մոտ 3 միլիոն 143 հազար դրամ:

3 համայնքներից 2-ում` Յաղդանի համայնքապետ Վալենտինա Կերխանաջևան ու Այգուտի համայնքապետ Հենրիխ Գաբրիելյանը մահացել են, իսկ Արագածի համայքնապետը հրաժարական է տվել այլ աշխատանքի տեղափոխվելու կապակցությամբ:

Հետաքրքիր են, թերևս, Յաղդանում նոր ավագանու ընտրության անհրաժեշտության առաջացման պատճառները: 2012 թվականի սեպտեմբերի 9-ին Յաղդանի գյուղական համայնքի ավագանու` օրենքով սահմանված 5 անդամներից փաստացի ընտրվել են 5-ը: Հետագայում' 2013 թվականի հուլիսի 29-ին, ավագանու անդամ Պատվական Մելիքսեթյանի լիազորությունները դադարեցվել են՝ անհամատաեղելի պաշտոնի անցնելու հիմնավորմամբ: Համայնքի ավագանու անդամներ Արամ Ջանջուղազյանը և Գագիկ Պետրոսյանն էլ 2014 թվականի մարտի 5-ին հրաժարականներ են ներկայացրել՝ այլ աշխատանքի անցնելու հիմնավորմամբ: Այսինքն' անհնար է դարձել համայնքի ավագանու հետագա նիստերի անցկացումը: