Կգաք, կտուգանվեք 10 հազար դրամ, չեք գա՝ 20 հազար դրամ. թաղապետարանի աշխատող

«Հայկական ժամանակը» գրում է.

«Երևանի քաղաքապետարանը մայրաքաղաքում գործունեություն իրականացնող բազմաթիվ տնտեսվարողների տուգանել է ձմռան ձնառատ ամիսներին իրենց խանութներին հարակից մայթերը ձյունից չմաքրելու համար։ Տուգանված տնտեսավարողները Երևանի տարբեր վարչական շրջաններից են, տուգանքի չափը՝ 10-20 հազար դրամ։ Երեկ մի քանի տասնյակ տնտեսվարողներ քաղաքապետարանում էին՝ Վարչատուգանային հանձնաժողովի նիստին մասնակցելու և պարզաբանումներ տալու համար։ Եվ ինչպես տնտեսվարողներն են պնդում, քաղաքապետարանի կողմից լիազորված տեսուչներն իրենց տուգանել են թաքուն, առանց իրազեկելու։ Նրանցից մեկը փաստաբան Ալբերտ Կանդալյանի վստահորդն է հանդիսանում, և փաստաբանը «Հժ»-ին ներկայացրեց խնդիրը։

«Թաղապետարանի աշխատողը մտնում է իմ խանութ ու տեղեկացնում, որ այսօր նիստ է լինելու, զգուշացնելով՝ կգաք, կտուգանվեք 10 հազար դրամ, չեք գա՝ 20 հազար դրամ։ Ավելին, երբ նիստի ժամանակ տուգանման հիմքերն եմ պահանջում, ինձ պատասխանում են, որ եթե պետք լինի, դատարանում ցույց կտան։ Այսինքն՝ դատարանը ի սկզբանե ցուցադրում է արհամարհական վերաբերմունք տնտեսվարողի նկատմամբ նույնիսկ հանձնաժողովում չցուցադրելով այդ հիմքերը»,–«Հժ»-ին պատմեց տուգանված տնտեսվարողներից մեկը։ Նա ասաց, որ իր խանութում կան տեսախցիկներ և շատ հեշտ է դատարանում ապացուցել, որ իր մոտ տեսուչներ չեն մտել։

Փաստաբան Ալբերտ Կանդալյանը մեզ հետ զրույցում ասաց, որ իր վստահորդի լիազորությամբ հայց է ներկայացնելու դատարան։ Նա մեր հարցին ի պատասխան չբացառեց, որ կարող է անգամ խմբակային հայց լինել ընդդեմ Երևանի քաղաքապետարանի։ Նա մեզ հայտնեց, որ տուգանված տնտեսվարողների թիվն անցնում է երկու հարյուրը։

Ըստ Ալբերտ Կանդալյանի, քաղաքապետարանի ընդունելությունների բաժնում ոչ միայն երեկ են տասնյակ տնտեսվարողներ սպասել հանձնաժողովից պարզաբանումներ տալու իրենց հերթին, այլև նախօրեին և դրանից մեկ օր առաջ»:

Մանրամասները՝ թերթի այսօրվա համարում։