Խնդրահարույց հարցերը կքննարկվեն միայն ՍԴ-ի որոշումը ստանալուց հետո. Արտեմ Ասատրյան

Կառավարությունը պարտադիր կուտակային կենսաթոշակային համակարգի որեւէ խնդրահարույց հարց չի կարող բովանդակային քննարկել, քանի դեռ չի ստացել ՍԴ որոշումը' ամբողջությամբ. լրագրողներին այսօր ասաց աշխատանքի եւ սոցիալական հարցերի նախարար Արտեմ Ասատրյանը` հավելելով, որ կստանան որոշումն ու նոր միայն մանրամասն ու ամբողջական կանդրադառնան այդ հարցերին:

Լրագրողների հարցին' վերահաշվարկի մասին դրույթը ի՞նչ է նշանակում, արդեն իսկ գանձված վճարները հե՞տ են վերադարձվելու, նախարարը պատասխանեց նույնը` կստանան ՍԴ որոշումը եւ արդեն լիարժեք, ամբողջական տեղեկատվություն կտրամադրեն: Այս պահին, նշեց նախարարը, պարզաբանում տրամադրվեց այն մասով, որը վերաբերում է իրավական ձեւակերպումներին, թե որոշումն ինչ է ենթադրում:

Հարցին' ՍԴ որոշումը չի՞ ազդի  կառավարության վարկանիշի վրա, Արտեմ Ասատրյանը պատասխանեց, թե ինքն այդպիսի խնդիր չի տեսնում, եւ ընդգծեց, որ յուրաքանչյուր մարմին եւ յուրաքանչյուր անձ ունի իր գործառույթները եւ պետք է դրանք պատշաճ իրականացնի: