Կառավարությունը քաջություն է արել. Արտեմ Ասատրյան

Սահմանադրական դատարանում շարունակվող` կուտակային կենսաթոշակային համակարգին վերաբերող այսօրվա նիստում ՍԴ անդամները հարցեր են տալիս աշխատանքի և սոցիալական հարցերի նախարար Արտեմ Ասատրյանին:

ՍԴ անդամ Ֆելքս Թոխյանը հարց տվեց, թե արդյո՞ք հաշվարկվել են սոցիալական ռիսկերը` համակարգը ներդնելու առումով: Արտեմ Ասատարյանը նախ սկսեց խոսել, թե ինչո՞ւ են համակարգը ներդրել` մասնավորապես խոսքը սկսելով նրանից, որ 1950-80-ականներին ծնվածների թիվը եղել է մոտ 80 հազար, և այժմ այդ սերնդի մարդիկ թոշակի են անցնում, այնինչ` 1990-ականներին ծնվածների թիվը կրկնակի քիչ է, և մեկ աշխատողին հասնում է երկու կենսաթոշակառու:

Սակայն Ֆ. Թոխյանը միջամտեց և խնդրեց նախարարին պատասխանել իր հարցին. «Ես համակարգի ներդրման պատճառները չէի ուզում լսել»:

Այնուհետև Ա. Ասատրյանը խոսեց այն մասին, որ հասարակությունը դեմ է արտահայտվում համակարգին, քանի որ չունի ամբողջական պատկերացում դրա մասին, կան անորոշություններ, հետեւաբար` մարդը չի էլ կարող կողմ լինել, և ստեղծված իրավիճակն ադեկվատ է: Սակայն երբ համակարգը սկսի գործել, և մարդիկ կարողանան իրենց անհատական հաշիվների վրա տեսնել իրենց գումարները, ապա արդյունքն այլ կլինի:

Ըստ նախարարի` այս համակարգը բավական բարդ է, որի նպատակը կենսաթոշակային տարիքում գտնվող մարդու բարեկեցությունը ապահովելն է: Ռիսկեր կան, և այդ առումով կառավարության կողմից համակարգին անցնելը քաջություն է: