Ռուսաստանի ԱԳՆ-ն` հայաբնակ Քեսաբի հետ կապված իրավիճակի մասին

Ռուսաստանի ԱԳՆ-ն մեկնաբանել է հայաբնակ Քեսաբի հետ կապված իրավիճակը:

«Վերջին օրերին  իրավիճակը Սիրիայում բնութագրվում է կառավարական ուժերի ու անօրինական զինված խմբավորումների միջեւ հակամարտության կտրուկ սրմամբ»,-  ասվում Ռուսաստանի ԱԳՆ տեղեկատվության վարչության մեկնաբանության մեջ:

Ինչպես նշում է աղբյուրը, հիմնական բախումները տեղի են ունենում Սիրիայի հյուսիս-արեւմուտքում: Մարտի 21-ին «Ալ Քաիդա»-ի հետ կապված ծայրահեղական խմբավորումները հարձակվել են Թուրքիային սահմանամերձ`  հայաբնակ Քեսաբի վրա: Զգուշանալով ահաբեկիչների ոտնձգություններից՝ Քեսաբի, Սամրայի եւ մոտակա բնակավայերի հայ բնակչությունը պատսպարվել է Լաթաքիայում:

Նշվում է նաև, որ սիրիացի զինվորականները գրոհայիններից հետ են վերցրել ռազմավարական կարեւորության դիրքերը եւ մտադիր են մոտ ժամանակներս վերականգնել վերահսկողությունը Քեսաբի սահմանային անցակետի նկատմամբ:

«Քեսաբի գրավումը խիստ քննադատության է արժանացել ողջ աշխարհի հայության կողմից: Երեւանում ՄԱԿ-ի ներկայացուցչության շենքի մոտ բողոքի ցույց է տեղի ունեցել»,- նշվում է ԱԳՆ-ի հայտարարությունում:

«ՌԴ ԱԳՆ-ն վճռականորեն քննադատում է ահաբեկչական եւ այլ բնույթի հանցանքները խաղաղ բնակչության հանդեպ, ինչպես նաեւ գրոհայինների կողմից սիրիական քաղաքների ու բնակավայրերի գնդակոծությունները: Այնպիսի տպավորություն է, որ գրոհայինների ակտիվացման նպատակն է` թույլ չտալ միջսիրիական բանակցությունները, խափանել քիմիական զենքի չեզոքացումը, ինչն անթույլատրելի է: Ռուսաստանը պատրաստ  է համագործակցել գործընկերների հետ` Սիրիայում ներքին արյունահեղ հակամարտության դադարեցման համար 2012-ի հունիսի 30-ի Ժնեւի կոմյունիկեի իրականացման հիման վրա»,- ասվում է մեկնաբանությունում: