Եվրոպան ու ԱՄՆ-ը թող իրենց մասին մտածեն. ՀՀԿ-ական պատգամավորի սենսացիոն հայտարարությունները

ԱԺ ՀՀԿ խմբակցության պատգամավոր Աշոտ Աղաբաբյանի գնահատականը Ղրիմի հանրաքվեի վերաբերյալ «բացարձակ դրական» է: Yerkir.am-ի հետ զրույցում նա նշեց, որ ճիշտ քայլ էր՝ Ղրիմում անցկացնել հանրաքվե՝ տվյալ տարածքի ազգաբնակչության ինքնորոշման իրավունքը հաշվի առնելով:

«Ուրախանում եմ, որ մոլորակի վրա դեռ ժողովուրդները կարողանում են ինքնորոշվել: Ղրիմում ապրող ուկրաինացիները լավ ապրել են ուզում, այնինչ` Ուկրաինան գնում է դեպի քաոսային վիճակ: Դրա համար էլ հանրաքվեով նրանք հայտնեցին, թե ում հետ են ուզում ապրել: Եթե չվերցնենք ազգային մտածողությունը, այլ վերցնենք ժողովրդական մտածողությունը` որ ժողովուրդն ուզում է լավ ապրել, ուրեմն հանրաքվեն ճիշտ քայլ էր»,- ասաց նա:

Աշոտ Աղաբաբյանի կարծիքով՝ Ղրիմի ուկրաինացիները հասկացել են, որ Սովետական միության ժամանակաշրջանում ավելի լավ են ապրել, քան Ուկրաինայի կազմում, իսկ Ուկրաինայի իշխանությունները փորձեցին դառնալ օլիգարխներ ու կոմերսանտներ՝ չապահովելով ժողովրդի կենսամակարդակը, փորձում էին պետություն կառուցել:

«Բնականաբար, այդ ժողովուրդը պետք է ուզենա ապրի ռուս ժողովրդի հետ, առավել ևս, որ Ղրիմը ռուսական տարածք է: Իմ կարծիքով՝ այդ ալիքը կտեղափոխվի Ուկրաինա, որովհետև մենք տեսնում ենք, որ որոշ ուկրաինական քաղաքներ նույնպես ցանկանում են միանալ Ռուսաստանին»,- ասաց ՀՀԿ-ական պատգամավորը՝ հնարավոր համարելով նաև Արևելյան Ուկրաինայի անցումը Ռուսաստանի կազմի մեջ:

Ինչ վերաբերում է այն հանգամանքին, որ Արևմուտքը չի ճանաչում Ղրիմի հանրաքվեն, Աշոտ Աղաբաբյանը նշեց, որ ԱՄՆ-ը և Եվրոպան չեն կարող պատժամիջոցներ կիրառել Ռուսաստանի նկատմամբ, որովհետև դրանից առաջինը իրենք կտուժեն տնտեսապես: «Եվրոպան ու ԱՄՆ-ը թող իրենց մասին մտածեն: Մեկ ընդունում են, մեկ չեն ընդունում: Տենց արեցին, որ հայերի նկատմամբ գենոցիդ իրականացվեց: Եվրոպայի երկրները ամեն մեկն իր շահերի մասին է մտածում, ի՞նչ բարեկամ, ի՞նչ հարևան... »,- նշեց պատգամավորը:

Դիտարկմանը, թե այդ դեպքում ինչո՞ւ էր Հայաստանը մեծ տեղ տալիս ընտրությունների ժամանակ եվրոպական դիտորդներին ու ընտրությունների վերաբերյալ նրանց արձանագրություններին, Աշոտ Աղաբաբյանը պատասխանեց, որ դա ընդամենը դեմոկրատական ընթացակարգ էր. «Բնական չի՞, որ իզուր էին գալիս Հայաստան: Եթե ժողովուրդը կատարում է իր կամքը, ուզում է` գան, ուզում է՝ չգան: Դրանք քաղաքական ֆիկցիաներ են: Մենք չգիտենք՞, թե ոնց ենք ուզում ապրել, պիտի Եվրոպան որոշի՞, թե մենք ոնց ենք ուզում ապրել»: