Ընդդիմությունը դեռ բավական սենսացիոն քայլեր ու հայտարարություններ կանի. ՀՀԿ-ական պատգամավոր

ԱԺ ՀՀԿ խմբակցության քարտուղար Հավհաննես Սահակյանը որևէ սենսացիա չի տեսնում այն բանում, որ ապրիլի 28-ին ոչ իշխանական չորս ուժերը ներկայացնելու են կառավարությանն անվստահություն հայտնելու առաջարկը: Այլ հարց է, որ այդ ուժերն են փորձում դա իբրև սենսացիա ներկայացնել: Այս մասին նա ասաց Yerkir.am-ի հետ զրույցում:

Հարցին` հնարավո՞ր է, որ որոշ հանրապետականներ կողմ քվեարկեն ոչ իշխանական չորս ուժերի կողմից կառավարությանն անվստահություն հայտնելու նախագծին, Հովհաննես Սահակյանը պատասխանեց, որ հենց դա կլինի սենսացիա:

«Չեմ հիշում մի դեպք, երբ այդ չորս քաղաքական ուժերը չխոսեն կառավարության հրաժարականի մասին, բայց պարզ չէ, թե ինչ գործիքակազմով են նրանք դա անելու, ինչպես են իրականացնելու: Կարող է` պահանջեն, գնան մի քիչ գոռան, հետ գան, կարող է` նախագիծ ներկայացնեն, կարող է` բյուջեի դեմ քվեարկեն»,- ասաց Հովհաննես Սահակյանը:

Նա նշեց, որ միայն լսում է այն մասին, թե չորս  ուժերը եթերային հանդիպումներ են ունենում, այլ կարևոր բանի մասին ինքը չի լսել: Ըստ ՀՀԿ-ական պատգամավորի` այդ հանդիպումների միակ ինտրիգն այն էր, թե Րաֆֆի Հովհաննիսյանը Գագիկ Ծառուկյանին որտեղ հանդիպեց` տա՞նը, մեծ դահլիճո՞ւմ, թե՞ դրսի «բեսեդկայում»:

«Լևոն Զուրաբյանը նախորդ հանդիպումներից ինչ-որ բան էր լսել ու եկել` միկրոինֆարկտից էր խոսում: Եթե քաղաքականության մեջ սենսացիան դա է, ուրեմն մեր ընդդիմությունը դեռ բավական սենսացիոն քայլեր ու հայտարարություններ կանի»,- ասաց Հովհաննես Սահակյանը: