1.5 միլիոն դրամ` 1 մետր պատի վերանորոգման համար

Վաղվա նիստում կառավարության հաստատմանը կներկայացվի Տավուշի մարզի Դիլիջանի քաղաքային համայնքի տարածքում Աղստև գետի ձախափնյա ափապաշտպան հենապատի վերականգնման հետազոտա-նախագծային եւ շինարարական աշխատանքների ֆինանսավորման նպատակով «Դիս փրոփերթիս» բարեգործական հիմնադրամին, որպես նվիրաբերություն, 250 միլիոն դրամ գումար հատկացնելու որոշման նախագիծը:

2014 թվականի պետական բյուջեով նախատեսված` կառավարության պահուստային ֆոնդի հաշվին գյուղատնտեսության նախարարությանը 2014 թվականի առաջին եռամսյակում 250 միլիոն  դրամ պետք է հատկացվի' այն նվիրատվության հիմունքներով «Դիս փրթփերփիս» բարեգործական հիմնադրամին տրամադրելու համար: Այս գումարով նախատեսվում է իրականացնել Դիլիջան քաղաքի Շամախյան տեղամասի հատվածում Աղստև գետի ձախափնյա ափապաշտպան պատի` վթարային վիճակում գտնվող 165 մ երկարությամբ հատվածի վերականգնման աշխատանքները: 

Աշխատանքների իրականացմամբ ակնկալվում է, որ գարնանային վարարումների ժամանակ կկանխվի վերոհիշյալ հատվածում Աղստև գետի ափապաշտպան արգելաթմբի քայքայումն ու փլուզումը, առափնյա տարածքները՝ ավտոճանապարհը, նորակառույց դպրոցը, բնակելի տները, ինժեներական կառույցները, շենք-շինությունները և այլն, զերծ կմնան ողողումներից: Իսկ այդ աշխատանքները մեր «մտահոգ» կառավարությունը ուզում է շատ շտապ' մինչեւ գարնանային վավարումները սկսել ու ավարտել:

Հետաքրքիր է, որ այս աշխատանքների անցկացման համար ո'չ մրցույթ է հայտարարվել, ո'չ հանրային քննարկում կազմակերպվել: Բայց այս հարցը «դուրս է գալիս», երբ որոշման նախագծի հիմնավորման մեջ կարդում ենք, որ Դիլիջան-Վանաձոր ավտոճանապարհի Դիլիջան քաղաքի Շամախյան տեղամասի հատվածում Աղստև գետի ձախափնյա ափապաշտպան հենապատի վերականգնման հետ կապված հարցը «Դիս փրթփերթիս» ԲՀ-ի ղեկավարության հետ քննարկվել է, ոչ ավելի, ոչ պակաս,  ՀՀ նախագահի հանձնարարությամբ: Այսինքն' էլ ի^~նչ քննարկում, ի^~նչ մրցույթ, «ամենագլխավորն» է հանձնարարել, եւ վերջ...

«Հաշվի առնելով Աղստև գետի գարնանային վարարումների վտանգը, մինչև դրանց սկսվելն աշխատանքներն հրատապ իրականացնելու անհրաժեշտությունը՝ ձեռք է բերվել պայմանավորվածություն, որ Հիմնադրամը վնասված հատվածի վերականգնման 250 մլն ՀՀ դրամ արժողությամբ հետազոտա-նախագծային և շինարարական աշխատանքները կիրականացնի իր ֆինանսական միջոցներով՝ պայմանով, որ ՀՀ կառավարությունը 2014թ. առաջին եռամսյակում Հիմնադրամին կտրամադրի 250 մլն ՀՀ դրամ նվիրաբերություն՝ նկատի ունենալով 2013թ. ՀՀ պետական բյուջեի պահուստային ֆոնդում գումարների սղությունը»,- նշվում է նախագծում:

Բա... Փաստորեն, կառավարության տղերքը հասկանում են, որ պետբյուջեի պահուստային ֆոնդում գումարները սուղ են: Բայց դա հասկանալով հանդերձ` ընդամենը 165 մետր հենապատ վերանորոգելու համար կառավարության պահուստային ֆոնդից փորձում են 250 միլիոն դրամ` մոտ 610 հազար ԱՄՆ դոլար «քերել»: Այսինքն' ստացվում է, որ 1 մ պատի վերանորոգման համար պետք է այդ սուղ միջոցներից ծախսվի 1 միլիոն 500 հազար դրամից կամ 3 հազար 695 դոլարից ավելի գումար...

Լավ էլ «տնտեսելով» են ծախսում պահուստային ֆոնդի սուղ գումարները:

Գեւորգ ԱՎՉՅԱՆ