Սկզբնական շրջանում տարեկան մոտ 100 հազար պլանշետ կարտադրվի Հայաստանում

«Միննո» և «ԱրմԹաբ» պլանշետների մասսայական արտադրությունը Հայաստանում կարող է սկսվել արդեն այս տարվա մայիսի վերջին, եթե ծրագրերին խանգարող հանգամանքներ չլինեն. լրագրողներին այսօր տեղեկացրեց «ԱրմԹաբ» ընկերության նախագահ Վահան Շաքարյանը:

Նա հայտնեց, որ արտադրությունը կազմակերպելու համար միայն արտադրատարածքն է տրամադրված ընկերությանը ազատ տնտեսական գոտում, որը դեռ պետք է վերակառուցվի ու հարմարեցվի պլանշետների արտադրության համար: Դրանից հետո պետք է համապատասխան գործիքներ ու հաստոցներ ներկրվեն: Եվ եթե ամեն ինչ լինի այնպես, ինչպես ընկերությունում են ծրագրել, ապա մայիսի վերջին Հայաստանում կսկսվի «ԱրմԹաբ» եւ «Միննո» պլանշետների մասսայական արտադրությունը:

Սկզբնական փուլում նախատեսվում է տարեկան մոտ 100 հազար «Միննո» պլանշետներ հավաքել Հայաստանում: Իսկ «ԱրմԹաբի» մասին Վահան Շաքարյանը տեղեկացրեց, որ, միայն համացանցի, հեռախոսազանգերով գրանցված տվյալները ամփոփելով, այսօրվա դրությամբ արդեն կա 1000-1050 հատ պատվեր. արտասահմանում մեր բազմաթիվ հայրենակիցներ «ԱրմԹաբ»-ի պատվերներ են տվել:

«ԱրմԹաբ»-ի արտահանման ակնկալվող ծավալների մասին էլ Վահան Շաքարյանը նշեց, որ դեռ պոտենցիալ գործընկերների հետ բանակցություններ են ընթանում, ու դրանցից հետո նոր միայն պարզ կլինի, թե տարեկան ինչքան «ԱրմԹաբ» պետք է արտադրվի ու արտահանվի:

Վահան Շաքարյանը դիմեց նաև քաղաքացիներին` խնդրելով այս պահին իրենց աշխատանքի համար չդիմել, քանի որ աշխատատեղերի բացում դեռ այս փուլում նախատեսված չէ: Դրա մասին ընկերությունը լրացուցիչ հայտարարություն կտարածի: