Ամուլսարի հանքավայրի շահագործման հեռանկարում` Հայաստանում կարտադրվի 12-ից 14 տոննա ոսկի

Այսօր կառավարության նիստի օրակարգին անցնելուց առաջ ՀՀ էկոնոմիկայի նախարար Կարեն Ճշմարիտյանը զեկուցեց Ամուլսարի հանքավայրի շահագործման մասին: Նախարարի խոսքով` կայացել է համաձայնություն շահագրգիռ ֆինանսական խմբերի միջև, ստորագրվել է պայմանագիր, ըստ որի` 325 միլիոն դոլարի չափով ներդրումներ իրականացնելու հանձնառություն են ստանձնել:

Դրա արդյունքում` երկու տարվա ընթացքում պիտի իրականացվի Ամուլսարի հանքավայրի շինարարությունը: Գումարներ են ավելացնելու միջազգային ֆինանսական կորպորացիաները և Վերակառուցման եւ զարգացման եվրոպական բանկը: Ներդրումները կազմելու են 460-ից 480 միլիոն դոլար, կստացվի 12-ից 14 տոննա ոսկի` արտադրված Հայաստանում, արդյունքում` արդյունավետ կդառնա նաև ոսկու ձուլակտորների արտադրության կազմակերպումը Հայաստանում:

Ներդրումներն իրականացվելու են մյուս տարի գարնանը, շինարարության մեջ զբաղված է լինելու  մոտ 1500 աշխատող:

Վարչապետ Հովիկ Աբրահամյանը հավելեց, որ բոլոր գերատեսչությունները պետք է աջակցեն այդ ծրագրի իրականացմանը, քանի որ դա շատ կարևոր ծրագիր է, որը 2016-2017 թթ. կբերի մեծ տնտեսական ակտիվություն:

Կարեն Ճշմարիտյանը հավելեց, որ, ըստ ԱՎԾ տվյալների, ՀՀ-ում օտարերկրյա ներդրումների աճ է գրանցվել, ընդ որում` բոլոր ուղղություններով: