Կուտակումներ, ընտրակաշառք եւ Տարոն Մարգարյանին ընտրելու կոչեր

«Բարեւ Երեւանը» ստացել է ահազանգեր ընտրախախտումների վերաբերյալ, որոնք ներկայացնում ենք ստորեւ:

5/20 տեղամասում կան կուտակումներ` 25-ից ավելի մարդ: Անհայտ անձինք, թաղային հեղինակություններ գտնվում են տեղամասում, շրջում եւ ուղղորդում ընտրողներին: Դիտորդ Կարեն Վարդանյանը ահազանգում է, որ «Յուքոմ» ընկերությունն իր աշխատակիցներին հրահանգել է ընտրել Տարոն Մարգարյանին:

6/06, 6/07 տեղամասերում կուտակումներ. տեղամասերի մոտ շուրջ 50 մեքենա է կանգնեցված:

10/10 տեղամասի առջեւ մեքենաների կուտակումներ:

Ավանի 1/21 տեղամաս թիվ 56 համարի երթուղային տաքսիներով բերում են ընտրողների:

4/22 տեղամասում հանձնաժողովի նախագահը թույլ է տվել մի անհայտ քաղաքացու քվեարկել ID-քարտով:

Մի քաղաքացի, ով չցանկացավ ներկայանալ, ահազանգեց, որ Զորավար 32 հասցեում, Թումանյանի անվան դպրոցում տեղակայված ընտրատեղամասի դիմաց բաժանում են ընտրակաշառք ՀՀԿ-ի օգտին եւ տալիս գունավոր գրիչներ՝ քվեարկությունը վերահսկելու նպատակով:

Մի քաղաքացի ահազանգել է, որ Շենգավիթի թիվ 27 դպրոցի մոտ ընտրակաշառք են բաժանում: