Վիրավորվել է հեռուստացույց դիտելիս. մանրամասներ Այգեպարում վիրավորված աղջկա մասին

Երեկ երեկոյան Այգեպարում հակառակորդի կրակոցից վիրավորված 16-ամյա Լիանա Անիկյանի գիտակցությունը տեղն է, վիճակը կայուն է, նրա կյանքին վտանգ չի սպառնում: Այս մասին yerkir.am-ին հայտնեցին Բերդի զինկոմիսարիատի հիվանդանոցից:

Yerkir.am-ի տեղեկություններով` զինվորականի աղջիկը վիրավորվել է հեռուստացույց դիտելիս: Երեկոյան նրանց տան լույսերը, ինչպես նաեւ գյուղի մյուս տներինը, անջատված են եղել: Թշնամու գնդակը դիպել է աղջկա ազդրոսկրին, այն քերծվել է, բայց, բարեբախտաբար, չի վնասվել:

Նշենք, որ Անիկյանների տան պատուհանները նայում են դեպի ադրբեջանական դիրքերը:

Ի դեպ` Լիանայի հայրը (արդեն հայտնել ենք, որ զինվորական է և ծառայության մեջ է Պառավաքարում) այդ օրն այցելել էր ընտանիքին: