Այգեպարում հաշվել են հակառակորդի գնդակոծության հասցրած վնասները

Հունիսի 27-28-ը ադրբեջանական կողմից Տավուշի մարզի հայկական դիրքերի ու բնակավայրերի ուղղությամբ իրականացված գնդակոծությունից հետո Այգեպարում արդեն 2 օր է` իրավիճակը հանգիստ է: Այգեպարի գյուղապետ Անդրանիկ Այդինյանը Yerkir.am-ի հետ զրույցում նշեց, որ այն պահից, ինչ հայկական դիրքերից հակառակորդի դիրքերի ուղղությամբ պատասխան կրակ արձակվեց, որով ստիպեցին ադրբեջանցիներին դադարեցնել կրակը, Այգեպարում «հարաբերական անդորր» է:

Եվ արդեն հնարավոր է խոսել, թե հակառակորդի գնդակոծության հետեւանքով Այգեպարն ինչ վնասներ կրեց: Ըստ գյուղապետի` գյուղի գազատարն էր վնասվել, փոքրիկ խոտածածկ տարածք էր այրվել, գյուղի տների, դպրոցի, մանկապարտեզի ուղղությամբ արձակված կրակոցներից պատերն են թեթեւ վնասվել, նաեւ` տանիքներ, ապակիներ, գույք…

«Ամենակարեւորը` ոչ մի արտառոց դեպք չունենք գյուղում, այս պահին ոչ մի վտանգավոր բան չկա»,- նշեց գյուղապետը, որի համար արդեն գյուղի ուղղությամբ արձակված կրակոցներն արտառոց չեն:

Նա վերահաստատեց նախապես տարածված այն տեղեկությունները, որ հակառակորդը գյուղի վրա կրակել է խոշոր տրամաչափի` ԴՇԿ տեսակի գնդացիրներից, որի գնդակների հետքերը, բնականաբար, մնում են պատերին, տանիքներին, գնդակներից էլ կան: Իսկ Այգեպարի բնակիչների մոտ, ովքեր, գյուղապետի բնորոշմամբ, խիզախ ու բարձր մարտական ոգով ժողովուրդ են, խուճապ չկա:

«Սպասում ենք տեսնենք` ինչ է, ոնց է… Ու նույնիսկ ոչ թե հետ փախչելու ցանկություն ունենք, այլ դեպի առաջ գնալու…»,- հավելեց Անդրանիկ Այդինյանը: