Իտալիայի Ա սերիա. 20-րդ տուր. ''Յուվենթուս''-ը շարունակում է հաղթարշավը

Իտալիայի 20-րդ տուրի  մեկնարկը տրվեց մայրաքաղաքի «Օլիմպիկո» մարզադաշտում , որտեղ տեղի «Ռոմա»-ն հյուրընկալեց ընթացիկ  առաջնության մրցաշարային աղյուսակը եզրափակող «Լիվորնո»-ին:

«Ռոմա»-ի ֆուտբոլիստ Մատեո Դեստրոն, ով մրցակցի տուգանային հրապարակում դուրս էր մնացել հսկողությունից,  հանդիպման արդեն 6-րդ րոպեին առաջ մղեց «մայրաքաղաքայիններին»: 30 րոպե անց Դեստրոն կարող էր դուբլի  հեղինակ դառնալ՝ գնդակն ուղարկելով դեպի մրցակցի դարպասը, սակայն «Լիվորնո»-ի պաշտպանին հաջողվեց  հետ մղել այն: Գոլից խուսափել, այնուամենայնիվ, չստացվեց. վրա հասած Քևին Ստրոոտմանը կրկնապատկեց խաղի հաշիվը: 

Խաղի վերջնական հաշիվը 77-րդ րոպեին ձևակերպեց Ադեմ Լյալիչը: Կիսապաշտպանի՝  մոտ 15 մետր հեռավորությունից կատարած հարվածից հետո հաշիվը դարձավ 3:0:

Թուրինի «Յուվենթուս»-ը սեփական հարկի տակ հանդիպեց  «Սամպդորիա»-ին:

17-րդ րոպեին Արթուրո Վիդալը  Պոգբայի փախանցումից հետո միայնակ դուրս եկավ դարպասապահի դիմաց և բացեց խաղի հաշիվը:  24-րդ րոպեին անկյունայինի իրացումից հետո Ֆերնանդո Լիորենտեն գլխի հարվածով հաշիվը դարձրեց  2:0: 38-րդ րոպեին Անդրեա Բարզագին գրավեց սեփական դարպասը, բայց թուրինցիները ընդամենը 3 րոպե անց կարողացան վերականգնել 2 գնդակի առավելությունը.  «Սամպդորիա»-ի դարպասին նշանակված 11 մետրանոց հարվածն անվրեպ իրացրեց Արթուրո Վիդալը ՝ ձևակերպելով դուբլ:

70-րդ րոպեին  Մանոլո Գաբբիադինին անկյունայինի խաղարկումից հետո հաշվի տարբերությունը հասցրեց նվազագույնի: Սակայն ավելին անել  հյուրերին չհաջողվեց:

 77-րդ րոպեին Պոլ Պոգբայի հեռահար հարվածից հետո  թուրինցիները ձևակերպեցին խաղի վերջնական հաշիվը՝ 4:2:  «Յուվենթուս»-ը տոնեց ընթացիկ առաջնությունում 12-րդ անընդմեջ հաղթանակը:

Միլանի «Ինտեր»-ը արտագնա խաղում ուժերը չափեց «Ջենովա»-ի հետ:

 Խաղից առաջ տեղացած հորդառատ անձրևը խոչընդոտեց թիմերին` խաղադաշտում ցույց տալու իրենց լավագույն որակները:  Այնուամենայնիվ, ավելի վտանգավոր էին գրոհում «Ջենովա»-ի ֆուտոլիստները, ինչի արդյունքում 83-րդ րոպեին Լուկա Անտոնելլին դարձավ այս խաղում միակ գոլի հեղինակը՝ 1:0:

  Տուրի եզրափակիչ խաղում «Միլան»-ը «Սան Սիրո»-ում ընդունեց «Վերոնա»-ին:

 «Միլան»-ի գլխավոր մարզիչ  Կլարենց  Զեդորֆը, ով վերջերս է ավարտել պրոֆեսիոնալ ֆուտբոլիստի կարիերան,  թիմի գլխավոր մարզչի պաշտոնում անցկացրեց առաջին հանդիպումը:

Այս խաղում միլանցիներին հաղթանակը տրվեց մեծ դժվարությամբ: Չնայած գործադրած մեծ ճիգերին, այնուամենայնիվ, միայն խաղավարտից 8 րոպե առաջ «ռոսոերիներիներին»  հաջողվեց բացել խաղի հաշիվը. հանդիպման 82-րդ րոպեին՝ 11 մետրանոց հարվածով Մարիո Բալոտելլին հաղթանակ պարգևեց իր թիմին՝ 1:0:

 Մինչ այս խաղը՝ Իտալիայի տիտղոսակիր ակումբներից մեկը՝ «Միլան»-ը, անցկացնելով 19 հանդիպում, հաղթանակ էր տոնել ընդամենը 5 խաղում, 7 խաղ ավարտել էր ոչ ոքի և նույնքան պարտություն կրել: Թիմը, վաստակած 22 միավորով, զբաղեցնում է 11-րդ հորիզոնականը:

 Տուրի մյուս խաղերում գրանցվեցին հետևյալ արդյունքները՝

«Ուդինեզե» - «Լացիո» -2:3 ( 11մ. ՝Անտոնիո Դի Նատալե 8’, Էմանուել Ագեմենգ-Բա 68’, 11մ՝ Անտոնիո Կանդրեվա 63’, Անրեա Լազարրի 82’, Հերանես 90’)

«Բոլոնիա»-«Նապոլի» 2:2 (Ռոլանդո Բիանկի 37’, 90’, 11մ՝ Գոնսալո Իգուաին 63’, Խոսե Մարիա Կալյեխոն 80’)

«Կիեւո»-«Պարմա» 1:2  (Ալբերտո Պալոչի 15’, Անտոնիա Կասսանո 25’, Ալեսանդրո Լուկարելլի 90’)

«Կատանիա»-«Ֆիորենտինա»  0:3 (Մաթեոս Ֆերնանդես 25’, Ալեսսանդրո Մատրի 28’, 41’)

«Սասուոլո»-«Տորինո» 0:2 (Կիրո Իմոբիլե 25’,  Մաթեո Բրիխի 49’,)

«Ատալանտա»-«Կալիարի» 1:0 (Ջակոմո Բոնավենտուրա 68’)

Իտալիայի Ա սերիայի մրցաշարային աղյուսակն՝ այստեղ: