Համազգային գործադուլի կոչ` ընդդեմ կուտակային կենսաթոշակային համակարգի

Այսօր առավոտյան ՀՀ Սահմանադրական դատարանը ստացել է ԱԺ ոչ կոալիցիոն խմբակցությունների 36 պատգամավորների դիմում-բողոքը, որով վիճարկվում է «Պարտադիր կուտակային կենսաթոշակային համակարգի մասին» օրենքը: Այս մասին Սահմանադրական դատարանի առջև հավաքված ցուցարարներին հայտնեց ՍԴ դիմումների բաժնի աշխատակից Հակոբյանը` հավելելով, որ դիմումին ընթացք կտրվի օրենքով սահմանված ժամկետում:

Ըստ պատգամավորների դիմում-բողոքի` ՍԴ-ն պետք է հակասահմանադրական ճանաչի օրենքը: «Ընդդեմ կենսաթոշակային պարտադիր վճարների» քաղաքացիական նախաձեռնության անդամները և ԱԺ պատգամավորները հայտարարեցին, որ սրանով իրենց պայքարը չի ավարտվելու: Օրինակ` ԱԺ «Ժառանգություն» խմբակցության ղեկավար Զարուհի Փոստանջյանը կոչ արեց համազգային գործադուլ անել, իսկ ԲՀԿ-ական պատգամավոր Նաիրա Զոհրաբյանն ասաց, որ այս անգամ չի գործի իշխանությունների հրահանգը, և արդարությունն, ի վերջո, կհաղթի:

Նշենք, որ ավելի վաղ «Ժառանգության» ներկայացուցիչ Արմեն Մարտիրոսյանը հայտնել էր, որ որևէ սպասելիք չունի ՍԴ-ից:

«Ընդդեմ կենսաթոշակային պարտադիր վճարների» քաղաքացիական նախաձեռնության անդամները կոչ արեցին ՍԴ-ին`  կասեցնել կուտակային կենսաթոշակային համակարգի պարտադիր բաղադրիչի գործադրումը, պարտադրել պատասխանատու մարմիններին, շահագրգիռ կողմերին` իրականացնել կենսաթոշակային համակարգերի նոր սցենարների մշակման, կամավոր կուտակային համակարգը նոր գործիքներով խրախուսելու, ինչպես նաև նոր համակարգի վերաբերյալ օրենսդրության՝ Սահմանադրության հետ համապատասխանեցնելու աշխատանքներ:

Նախաձեռնության հայտարարությանը կարող եք կարդալ այստեղ:

Տեսանյութը` yerkir.am-ի