Եթե հայ ես... Սևան Նիշանյան

Թուրքիայում գտնվող հունական հին գյուղում՝ Շիրինջեում, բացառիկ կառույցներ հիմնելու միջոցով աշխարհի ուշադրությունը գրաված հայազգի Սևան Նիշանյանին դարձյալ դատի են տվել. հայտնում է agos.com-ը:

Նշանյանը զրուցել է լրագրող Էմրե Էրթանի հետ:

-Շիրինջեում Ձեր ո՞ր գործի համար են Ձեզ դատի տվել:

-2008 թվականին փոքրիկ կառույցներից մեկում «կնիքը խախտելու» համար երկու տարի ազատազրկվեցի: Ինձ մտահոգում է այն, որ դրան հաջորդեցին մի քանի այլ տուգանքներ: Կառույցներից 9-ը ապօրինի էին: Ընդհանուր առմամբ` 19 դատական գործ ունեմ: Մի քանի օր առաջ դատարանից նամակ ստացա. պետք է 10 օրվա ընթացքում ներկայանամ:

- Բոլորս էլ գիտենք, որ Կ.Պոլսում 70 տոկոսը ապօրինի կառույցներ են, ոչ մեկ չի տուգանվում, իսկ Դուք…

-Մեկ իրականություն կա, որ բոլորը գիտեն: Այս հարցը ապօրինության խնդիր չէ:

-Իսկ կարծո՞ւմ եք, արդյոք, որ Ձեր հայ լինելը դեր ունի տուգանվելու հարցում:

-Դա բացահայտ է: Թուրքիայում ցանկացած յուրահատուկ կառույցի դեպքում տուգանվում են: Եթե նույնիսկ կառուցողի ազգանունը «Օզթուրք» է (մաքուր թուրք), տուգանվում է, մանավանդ եթե հայ ես՝ տուգանքը կրկնապատկվում է:

-Ափսոսո՞ւմ եք, որ յուրահատուկ եք:

-Ուրիշ կերպ չէի կարող լինել: Մարդը չի կարող ինքն իրեն փոխել: Կառուցվածքս այսպես է, և սա ինձ դուր է գալիս: Երիտասարդության տարիներին մարդիկ ասում էին` այս բնավորությունդ, այդ բնավորությունդ փոխի, այդպես մի եղիր, այսպես եղիր: Որոշ տարիքից հետո հասկանում ես, որ որքան էլ փորձես՝ ինչ կաս, դա ես: Երբ սովորում ու ընդունում ես քեզ այնպես, ինչպիսին կաս, ապա կյանքն ավելի հեշտ է սկսում թվալ: Գործերովս հպարտանում եմ, լավ գործեր եմ արել: Լինի՛այս գյուղում, լինի՛ Մաթեմատիկայի գյուղում, թատրոնի դպրոցում, գիտական աշխատանքներս, բառարանս, հանրային բանավեճերս: Հավատում եմ, որ շատ մաքուր և կոկիկ գործ եմ արել: Հավատում եմ, որ այս երկրում մարդկանց համար օգտակար գործեր եմ արել և երկրիս տվել ավելին, քան ստացել: Սրանով լավ եմ զգում, արդեն մարդ սրանից ավելի ի՞ նչ կարող է անել կյանքում: