Թուրքիայում կալանավորված Սևան Նիշանյանը նամակ է հղել ԱՄՆ Հայ Դատի հանձնախմբին

Թուրքիայում կալանավորված Սևան Նիշանյանը գրավոր նամակով պատասխանել է ԱՄՆ Հայ  Դատի հանձնախմբին, որը համերաշխության նամակ էր հղել նրան, երբ 2014 թվականին ՀՀ Սփյուռքի նախարարության կողմից  նա պարգևատրվել էր Վիլյամ Սարոյանի մեդալով :

Նշենք, որ Սևան Նիշանյանը Թուրքիայում ազատազրկման է ենթարկվել «ապօրինի» շինարարություն կատարելու  և «կնիք կեղծելու» մեղադրանքով: Պոլսահայ մտավորականը բազմիցս հանդես է եկել թուրքական կառավարության սխալների հրապարակային քննադատությամբ: Նա նաև Թուրքիայում մշտապես բարձրաձայնել է Հայոց ցեղասպանության իրողության մասին: Իշխանությունները  նրան ազատազրկել են 17 տարով:

Demokrathaber-ը տեղեկացնում է, որ նոյեմբերի 15-ին՝ Ձերբակալված գրողների օրվա կապակցությամբ գրված նամակում Նիշանյանն ուշագրավ մեկնաբանություններ է արել Թուրքիայում հատկապես վերջին շրջանում տեղի ունեցող` ժողովրդավարության և մարդու իրավունքների դեմ խախտումների, ձերբակալությունների մասին:

Իզմիրի բանտից ԱՄՆ Հայ Դատի հանձնախմբին ուղղված իր նամակում Նիշանյանն իր ձերբակալության հանգամանքը կապել է երկրում տիրող իրավիճակի հետ: «Իմ ձերբակալությունը գուցե գալիք արհավիրքների ծանուցումն էր»,-  նշել է նա:

Կայքը նաև հրապարակել է Նիշանյանի նամակից մի հատված, որում, մասնավորապես, ասվում է. «Մինչև վերջերս այս երկրում շատեր համարձակ էին ավելի դեմոկրատական, լիբերալ և հանդուրժող ապագայի մասին մտածելիս: Հպարտությամբ կարող եմ նշել, որ մի շարք հայ մտավորականներ, Հրանտ Դինքի գլխավորությամբ, ակտիվ մասնակցություն ցուցաբերեցին այդ նպատակի բարձրաձայնման և զարգացման գործում:  

Մեծամասնության շրջանում սարսափելի հիասթափություն առաջացրեց այն, որ վերջին շրջանում Թուրքիան հայտնվեց բռնության մթնոլորտի և աբսոլյուտիզմի մեջ:  Իմ ձերբակալությունը գուցե գալիք արհավիրքների ծանուցումն էր:

Այժմ գրողների և  հասարակական կարծիք ձևավորողների զանգվածային ձերբակալությունները ցույց են տալիս արդարադատության համակարգի ոչնչացված լինելը, մինչդեռ քրդական քաղաքականության վերացումն ու սահմանադրական կարգի փլուզումը մատնանշում են տխուր ապագան այն երկրի, որի ողբերգական անցյալն ի վերջո հաղթահարելու հույսեր կան դեռ:

Հուսով եմ, որ  ԱՄՆ-ում մեր ընկերները, հատկապես` Հայ Դատի հանձնախումբը, կշարունակեն բավարար զգայնություն ցուցաբերել այս դժբախտ իրավիճակին, որի մեջ գտնվում է Թուրքիան: Այս երկիրը, ուզենք, թե՝ ոչ, ներկայացնում է մեր համատեղ ժառանգության մի  խոշոր հատվածը: Խնդիրը քաղաքակիրթ հասարակության պահպանումն է, միաժամանակ՝ Հայկական հարցը, քանի որ հայերը, ինչպես աշխարհի մյուս ազգերը, կարող են ապրել, գուցե նաև  բարգավաճել ազատության, հանդուրժողականության և քաղաքավարության մթնոլորտում»: