Հիմա ի՞նչ անենք, բոմժ դառնա՞նք. ոսկու շուկայի աշխատակիցները գործադուլ կանեն

Արդեն հայտնել ենք, որ ոսկու շուկայի աշխատակիցներն այսօր բողոքի ակցիա են կազմակերպել շուկայի, այնուհետև նաև ՀՀ կառավարության շենքի առջև: Մոտ 100 աշխատակիցներ դժգոհում են Լեւոն Խալիկյանի ղեկավարած՝ ՀՀ էկոնոմիկայի նախարարության շուկայի վերահսկողության պետական տեսչության գործունեությունից, որը վերջին մեկ շաբաթվա ընթացքում իրականացրած ստուգումների արդյունքում խոշոր չափով տուգանքներ է նշանակել:

Քիչ առաջ ակցիայի մասնակիցներին ՀՀ կառավարության շենքի մոտ հանդիպեց կառավարության աշխատակազմի քաղաքացիների ընդունելության և դիմումների վարչության պետ Ալեքսանդր Ղազարյանը: Ոսկերիչները դժգոհեցին, որ տուգանքներն անօրինական են:

«Ժողովուրդն այսօր չեղած տեղից հարկերը տալիս է, ամեն ինչ անում է, մի կերպ ընտանիքներս պահում ենք, էլ ի՞նչ եք ուզում»,- ասաց քաղաքացիներից մեկը:

Ղազարյանը, լսելով բողոքները, վերցրեց քաղաքացիներից մի քանիսի հեռախոսահամարները և հավաստիացրեց, որ հարցին լուծում կտրվի: Բնակիչներն էլ, իրենց հերթին, սպառնացին, որ եթե խնդրին լուծում չտրվի, գործադուլ կհայտարարեն:

«Այսօր բոլորս տոկոսների տակ ենք, վարկեր ենք վերցրել, որ մեր ընտանիքները պահենք, բայց պետությունը մեր գումարները խլում է, հիմա ի՞նչ անենք, բոմժ դառնանք, ընկնենք փողոցնե՞րը»,- վրդովված ասաց ոսկերիչներից մեկը:

Մանրամասները` yerkir.am-ի տեսանյութում: