Լավ եմ արել` ջարդել եմ, անշնորհք ժողովուրդ են. ոսկու շուկայի տերը շարունակում է սպառնալ. iLur.am

iLur.am-ը գրում է. «Այսօր կառավարության դիմաց կրկին բողոքի ցույց են անում «Շրջանառության հարկի մասին» օրենքից դժգոհ առեւտրականները: Մինչ ակցիայի մեկնարկը առավոտյան շուտ Երեւանի ոսկու շուկայի անվտանգության աշխատակիցները՝ սեփականատեր Վաղարշ Աբրահամյանի հրահանգով եւ մասնակցությամբ մոտ հինգ-վեց սեղաններ են ջարդել:

«Լավ եմ անում, չեք ենթարկվում օրենքին, դրա համար էլ պատժում եմ ձեզ», - iLur.am_ին ասաց դրանից որոշ ժամանակ անց Հանրապետության հրապարակ եկած Վաղարշը: Նրա խոսքով, եթե տաղավարների վարձակալները չդադարեցնեն բողոքի ցույցերը, «իրանց տեղերը ուրիշներին է տալու»:

iLur.am-ի թղթակիցը տեղեկացնում է, որ ոսկու շուկայի վարձակալները խուսափում են տեսախցիկների առաջ ելույթ ունենալ: Ոսկու շուկայում աշխատողների քանակն այս պահին շատ քիչ է»:

Հիշեցնենք, որ այսօր առավոտյան շուկայի սեփականատեր Վաղարշը զայրացել և ջարդուխուրդ էր արել ոսկու շուկայի սեղանները, քանի որ իրեն պատկանող շուկայում տարածքներ վարձակալած ոսկերիչների մի մասը բացակայում էր` նրանք գնացել էին կառավարության շենքի մոտ` բողոքի ակցիային մասնակցելու: