Լեդի Հակոբի եղբորորդին դատապարտվեց 15 տարվա ազատազրկման

Մալաթիա-Սեբաստիա վարչական շրջանների ընդհանուր իրավասության դատարանը` դատավոր Տիգրան Պետրոսյանի նախագահությամբ, քիչ առաջ հրապարակեց Մալաթիայի նախկին թաղապետի որդու՝ Սեդրակ Զատիկյանի սպանության պատվերի գործով վճիռը:

Ըստ այդմ` գործով ամբաստանյալ Ստեփան Հակոբյանը (ԱԺ նախկին պատգամավոր Հակոբ Հակոբյանի` Լեդի Հակոբի եղբորորդին) մեղավոր ճանաչվեց ՀՀ ՔՕ 38-104 հոդվածի 2րդ մասով եւ դատապարտվեց 15 տարվա ազատազրկման, սակայն դատարանը նրան արդարացրեց ՀՀ ՔՕ 235 հոդվածով նախատեսված մեղադրանքից, պատժից հաշվարկեց նախնական կալանքի տակ պահելու ժամկետը և վերջնական պատիժ սահմանեց 14 տարի 11 ամիս ժամկտով: Վճռի հրապարակումից հետո Ստեփան Հակոբյանի բարկացած  կողմնակիցները սեռական բնույթի հայհոյանքներ հնչեցրեցին դատարանի հասցեին:

yerkir.am-ի հետ զրույցում սպանված Զատիկյանի հարազատները հայտնեցին, որ Հակոբյանին պետք է ցմահ դատապարտեին,  և որ այս պատժաչափը նրա համար մեղմ էր ընտրված: Նրա համար մեղադրող դատախազ Արմեն Մարուխյանը 15 տարվա ազատազրկում էր առաջարկել:

Ստեփան Հակոբյանն ամուսնացած է և խնամքի տակ ունի 3 երեխա: