Դատախազին հայհոյելու գործը կքննի Կենտրոնի դատարանը

Ամբաստանյալի կողմից դատական նիստերի դահլիճում մեղադրանքը պաշտպանող դատախազի ուղղությամբ ջրով լի պոլիմերային շիշը նետելու, դատախազին հայհոյելու և սպանության սպառնալիքներ հնչեցնելու փաստերի առթիվ հարուցված քրեական գործը գտնվում է Կենտրոն և Նորք-Մարաշ վարչական շրջանների ընդանուր իրավասության դատարանի դատավոր Գագիկ Պողոսյանի վարույթում:

Նշենք, որ դատավարական ղեկավարում իրականացնող դատախազը երեկ է հաստատել մեղադրական եզրակացությունը:

ՀՀ հատուկ քննչական ծառայությունում իրականացված նախաքննությամբ ձեռք բերված ապացույցների հիման վրա Ա.Պետրոսյանին մեղադրանք է առաջադրվել ՀՀ քրեական օրենսգրքի 347-րդ հոդվածի 3-րդ մասով:  Մեղադրյալն իրեն լիովին մեղավոր է ճանաչել։

Հիշեցնենք, որ միջադեպը տեղի էր ունեցել հուլիսի 12-ին: Մնացական Մարտիրոսյանի նախագահությամբ ընթացքող' խոշոր չափերի թմրամիջոցներ ձեռք բերելու, պահելու և իրացնելու մեջ մեղադրվող 9 անձանց  գործով նիստի ընթացքում ամբաստանյալ  Արթուր Պետրոսյանը պլաստիկ շիշ էր նետել մեղադրող դատախազ Վիգեն Միլիտոնյանի ուղղությամբ,  հայհոյել նրան: Պատճառը մեղադրական ճառն էր, ըստ որի` դատախազն  ամբաստանյալ   Արթուր Պետրոսյանի  համար պահանջել էր  15, իսկ նրա կնոջ' Ալլա  Մախովայի համար` 10 տարվա ազատազրկում:

Միջադեպի տեսանյութը կարող եք դիտել` այստեղ: