Մաքսային միությանն անդամակցելու շարմազանովյան դիտարկումները` երեք կետով

Քաղաքական աշունը մեկնարկել է հետաքրքիր զարգացումներով, ուշադրության արժանի է սեպտեմբերի 3-ին Մոսկվայում տեղի ունեցած Հայաստանի եւ Ռուսաստանի նախագահների հանդիպումը, որը կարելի է արդյունավետ որակել դաշնակից երկու երկրների համար. ԱԺ-ում հայտարարությունների ժամանակ ասաց ԱԺ փոխնախագահ Էդուարդ Շարմազանովը:

Այնուհետեւ նա ներկայացրեց ՀՀ եւ ՌԴ նախագահների հանդիպման կապակցությամբ իր դիտարկումները` կետերով: Ըստ այդմ`

«Առաջին` կողմերը հայտարարեցին, որ Ղարաբաղյան հակամարտությունն ունի բացառապես քաղաքական լուծում` ԵԱՀԿ Մինսկի խմբի շրջանակներում: Սա նշանակում է որ հարեւան Ադրբեջանի եւ նրա ավագ եղբայր Թուրքիայի` խնդրի լուծման այլընտրանքային, այդ թվում` ռազմական լուծման նկրտումները հօդս են ցնդում:

Երկրորդ` Հայաստանի եւ Ռուսաստանի ղեկավարները պատրաստակամություն հայտնեցին արդիականացնել ու դիվերսիֆիկացնել թե’ երկրի տնտեսությունը, թե’ երկրի էներգետիկ անվտանգության համակարգը: Այս խնդիրը հավելյալ կարեւորություն է ստանում հայկական ԱԷԿ-ի շահագործման ժամկետի երկարաձգմանն ուղղված աշխատանքների համատեքստում:

Երրորդ` երկու դաշնակից պետությունները պատրաստակամություն են հայտնում մինչեւ 2020 թվականը երկարաժամկետ տնտեսական համագործակցություն ծավալել, մասնավորապես` հայկական կողմը քաղաքական հայտարարությամբ ազդարարեց, որ պատրաստ է միանալու Մաքսային միությանը, որը նոր տնտեսական հնարավորություններ կընձեռի մեր պետությանը»,- թվարկեց Էդուարդ Շարմազանովը:

Նա ասաց, որ Սերժ Սարգսյանի հայտարարության համատեքստում հստակ նշվել է, որ Հայաստանը պատրաստ է շարունակել քաղաքական երկխոսությունն իր եվրոպացի գործընկերների հետ, սակայն Մաքսային միությանն անդամակցելու մասին հայտարարությունը ոմանց համար դարձավ ամպրոպ` անամպ երկնքում:

Շարմազանովի կարծիքով` սկսեցին շրջանառվել տարբեր կարծիքներ, ու հասարակությանն արհեստականորեն բաժանեցին արեւմտամետների կամ ռուսամետների:

«Մենք իրականացնում ենք քաղաքականություն, որը բացառապես բխում է մեր պետական ու ազգային շահերից: Եվ մեր պետական ու ազգային շահը մեզ ստիպում է, որ մենք խորացնենք հարաբերությունները մեր միակ ռազմավարական դաշնակից ՌԴ-ի եւ մեր եվրոպացի ու այլ գործընկերների հետ»,- շեշտեց ԱԺ փոխխոսնակը` կարծիք հայտնելով, թե նրանք, ովքեր Հայաստան-Եվրոպա հարաբերություններում փորձում են վերջակետ դնել, սխալվում են:

«Ուզում եմ բարեկամական խորհուրդ տալ մեր ընդդիմախոսներին` կարիք չկա մութ սենյակում սեւ կատու փնտրել, երբ կատուն այդ սենյակում չէ»,- իր խոսքն ամփոփեց Է. Շարմազանովը: