Մեխանիկին էր պետք խալաթ հագցնել և տանել դատարան. փաստաբան

Yerkir.am-ի հետ զրույցում ՀՀ փաստաբանների պալատի անդամ Ռուբեն Բալոյանը անթույլատրելի համարեց Հայաստանի քաղաքացուն նման  վերաբերմունքի արժանացնելը: «Ի՞նչ է նշանակում` տղամարդուն կանացի խալաթ հագցնել: Թող գնային նրա համար հագուստ գնեին: Մեր երկրում նման բան չի եղել. անգամ ծանր հանցագործության մեջ մեղադրվողներին նման կերպ չեն նսեմացրել»,- ասաց նա:

Մեր դիտարկմանը, թե Հարությունյանն իրավունք ունե՞ր չենթարկվելու քննչական մարմին և հրաժարվելու այդ հագուստից, փաստաբանը պատասխանեց. «Որևէ մեկը չէր կարող նրան ստիպել այդ հագուստը կրել,  պարզապես նա հոգեկան շոկի մեջ է եղել և դեղերի ազդեցության տակ: Իրականում այդ մեքենայի  մեխանիկին պետք է խալաթ հագցնեին  և տեղափոխեին դատարան, որ անսարք բեռնատարը չտրամադրեր վարորդին»:

Բացի այդ, ըստ փաստաբանի, զոհվածների թվով չէ, որ որոշվում է վարորդի մեղավորությունը: «Ցավում եմ կատարվածի համար, սակայն անմարդկային եմ համարում վարորդին նման վիճակում դատարան բերելը և լրատվամիջոցներով ցուցադրելը: Հրաչյա Հարությունյանը ներկայումս գտնվում է հոգեկան ծանր վիճակում: Նա կարիք ունի պրոֆեսիոնալ պաշտպանության: Ինձ մեծ գումարներ պետք չեն: Եթե կգտնվեն հովանավորներ և ինձ կօգնեն, պատրաստ եմ մեկնել Մոսկվա և սատար կանգնել մեր հայրենակցին»,- նշեց փաստաբանը: