Պետք չէ զուգահեռներ տանել Արցախի և Աբխազիայի միջև. Փաշինյան

ՀՀ  վարչապետ Նիկոլ Փաշինյանը հարցազրույց է տվել գերմանական «Դոյչե Վելե»-ին՝ խոսելով նաև ԼՂ հակամարտության կարգավորման մասին:

Նա կրկնել է նախկինում արած այն հայտարարությունները, որ Ադրբեջանի նախագահ Իլհամ Ալիևի հետ հանդիպումները դեռ ոչ պաշտոնական են, և դրանք բանակցություններ չի կարելի համարել, նաև ասել է, որ չի կարող բանակցել Արցախի անունից, քանի որ Արցախի բնակիչները չեն մասնակցել ընտրություններին և իրեն նման մանդատ չեն տվել:

Լրագրողի հարցին` Հայաստանը կցանկանա՞ր, որ Ռուսաստանը  ճանաչի Լեռնային Ղարաբաղի անկախությունը, ինչպես դա արեց Աբխազիայի դեպքում, ՀՀ վարչապետը պատասխանել է, որ կարծում է` պետք չէ զուգահեռներ տանել Արցախի և Աբխազիայի միջև:

«Դրանք լիովին այլ հակամարտություններ են և տարբեր իրավիճակներ: Աբխազիայի բնակիչները ներկայումս կարող են ժամանել Թբիլիսի, առևտուր անել այնտեղ, շփվել մարդկանց հետ, և այնտեղ դա սովորական բան է: Սակայն ԼՂ հակամարտության դեպքում դա հնարավոր չէ: Ադրբեջանից արտաքսում են ազգությամբ հայերին, այդ թվում` այլ երկրների քաղաքացի»,- ասել է նա: