Արթուր Աբրահամը ռինգ կվերադառնա օգոստոսի 24-ին

Հայ բռնցքամարտիկ Արթուր Աբրահամը մինչև 2015 թվականը երկարաձգել է պայմանագրի ժամկետը Sauerland Event գերմանական պրոմոութերական ընկերության հետ. հայտնում է Աբրահամի մամլո խոսնակ Սիրան Գրիգորյանը:

«Ուրախ եմ, որ մարզիչներիս հետ աշխատանքս շարունակելու հնարավորություն կունենամ»,- նշել է Արթուր Աբրահամը:
Ավելի վաղ նա ասել էր, որ եթե Sauerland Event-ը համաձայնության չգա իր փաստաբանի հետ (տարաձայնությունը հոնորարների վերաբերյալ էր), ապա ինքը չի մենամարտի ո'չ օգոստոսի 24-ին, ո'չ ավելի ուշ:

Այսպիսով, սուպերմիջին քաշային կարգում պրոֆեսիոնալ բռնցքամարտի աշխարհի նախկին չեմպիոն, հայազգի Արթուր Աբրահամը (36-4, 21) ռինգ է վերադառնալու օգոստոսի 24-ին, մենամարտը նախանշված է Գերմանիայի Շվերինե քաղաքում:
Արթուր Աբրահամը մենամարտելու է 30-ամյա Վիլբեֆորս Շիհեփոյի (20-6, 15) հետ: Վերջինը աֆրիկյան Նամիբիա պետությունից է, Շիհեփոյին կոչում են նաեւ Սեւ Մամբա: