Հովիկ Աբրահամյանը չի հավատում օֆշորային սկանդալին

Շաբաթ օրը նախագահ Սերժ Սարգսյանի հրավիրած խորհրդակցությունից հետո կրկին ակտիվացել են իշխանության ներսում տարբեր թեւերի գոյության մասին խոսակցությունները: Այսօր ԱԺ-ում մի քանի լրատվամիջոցների հետ զրույցում ԱԺ նախագահ Հովիկ Աբրահամյանն անդրադարձավ այդ խոսակցություններին, մասնավորապես` «իր եւ վարչապետի թեւերի մասին»:

«Նման թեւեր գոյություն չունեն մեր կուսակցությունում, մեր թիմի մեջ: Պարզապես մարդիկ կան, որ փնտրում են թեւեր, չգիտեմ` ինչ թեւեր են փնտրում, ում թեւերն են, ում ականջներն են փնտրում: Չկա նման բան»,- հայտարարեց ԱԺ նախագահը:

Նա եւս մեկ անգամ անդրադարձավ ԱԺ-ում ՎՊ հաշվետվության վերաբերյալ իր ելույթին, որը ոմանց հիմք էր տվել ասելու, թե սա իշխանության ներսում առկա թեւերի ապացույցն է: Աբրահամյանը նշեց, որ իր ամփոփիչ ելույթում էլ է ասել, որ բոլորն են պատասխանատու թերացումների, յուրացումների համար, եւ որ թիմում չունեն որեւէ մեկի հետ պայմանավորվածություն, որ պետք է տվյալ անձը գա որեւէ պաշտոնի եւ զբաղվի թալանով, յուրացումներով:

Լրագրողների դիտարկմանը, որ իր այդ ելույթից հետո հրապարակվեց փաստաթուղթ, որ ԱԺ նախագահի բարեկամները էժան դիզվառելիք են գնել, Աբրահամյանն արձագանքեց, որ այդ դիզվառելիքից օգտվել են բոլոր հողօգտագործողները, այդ թվում` իր բարեկամները, որեւէ խախտում այդտեղ չկա: Ըստ ԱԺ նախագահի` թեեւ «որոշ ծախու լրատվամիջոցներ գրեցին, որ այդ դիզվառելիքը անապահով խավերի համար էր, բայց դա այդպես չէր, կառավարության նման որոշում չկար»:

Yerkir.am-ը Հովիկ Աբրահամյանից հետաքրքրվեց, թե իր համար տարօրինակ չէ՞ր, որ նախագահը շաբաթ օրվա խորհրդակցության ժամանակ որեւէ բառ չասաց վարչապետի անվան հետ կապված օֆշորային սկանդալի վերաբերյալ: «Ընդհանրապես ես չեմ էլ հավատում այդ օֆշորային սկանդալին, որեւէ լուրջ հիմնավորում չեմ էլ տեսել մինչեւ հիմա որեւէ ԶԼՄ-ում»,- հայտարարեց ԱԺ նախագահը: