ՀԱԿ-ը հերքում է, Գորիսի դեպքի հետ կապված, Ջհանգիրյանին հարցաքննության կանչելը

Panorama.am-ը, հղում տալով  ՀԱԿ աղբյուրներին, տեղեկություն էր տարածել, որ  ԱԺ ՀԱԿ խմբակցության պատգամավոր Գագիկ Ջհանգիրյանը Գորիսի դեպքերի գործով զինվորական դատախազի հանձնարարությամբ կանչվել է պաշտպանության նախարարության քննչական ծառայություն` հարցաքննության: Ըստ նույն աղբյուրի` Ջհանգիրյանին հարցաքննության կանչելու համար հիմք է հանդիսացել «Օրակարգ» թերթին տված հարցազրույցում  տեղ գտած հետևյալ հայտարարությունը. «Ծանրագույն հանցագործություն է տեղի ունեցել` մեկը սպանվել է, բանակի հրամանատարը ծանր վիրավորվել է, այլ վիրավորներ էլ կան, ես վստահ եմ: Նաև կարծում եմ, որ երկուսը չեն վիրավոր, իմ տեղեկատվությամբ` վիրավորների թիվն ավելի շատ է»:

 

Yerkir.am-ին չհաջողվեց կապ հաստատել ՊՆ քննչական ծառայության հետ` ճշտելու համար` արդյո՞ք պատգամավորը հրավիրվել է հարցաքննության: Սակայն Հայ ազգային կոնգրես կուսակցության մամլո քարտուղար Արման Մուսինյանը Yerkir.am-ի հետ զրույցում հերքեց այդ լուրը` ասելով, որ նման բան չկա, տեղեկությունն անհեթեթություն է: Նա նշեց նաև, որ պատգամավորն այս պահին մասնակցում է ԱԺ հերթական քառօրյային և զարմացած է իր անվան հետ կապված տեղեկությունից: