Սերբիան Քեթրին Էշթոնից ակնկալում է արդարացի եւ անկողմնակալ մոտեցում

Սերբիան ԵՄ արտաքին քաղաքականության գերագույն հանձնակատար Քեթրին Էշթոնից ակնկալում է արդարացի եւ անկողմնակալ մոտեցում հարցերի լուծման գործում, որոնք քննարկվելու են այսօր Բրյուսելում կայանալիք` Բելգրադի եւ Պրիշտինայի հարաբերություններին վերաբերող բանակցությունների ժամանակ. հայտարարել է Սերբիայի վարչապետ Իվիցա Դաչիչը:

Ըստ նրա` իրենք առավելագույն ջանքերը կգործադրեն, որ համաձայնություն ձեռք բերվի Սերբիայի կողմից ԵՄ անդամակցության անհրաժեշտ պայմանները կատարելու համար: «Մենք նույնը ակնկալում ենք Պրիշտինայից, իսկ Քեթին Էշթոնից` որ այդ ծրագիրը ընդունելի կլինի երկու կողմի համար էլ` առանց ներառելու հարցեր, որոնք բրյուսելյան համաձայնագրերի մաս չեն կազմում»,- ասել է Սերբիայի վարչապետը:

Ի դեպ, երեկ Սերբիայի նախագահ Տոմիսլավ Նիկոլիչը Գերմանիայի արտգործնախարարի հետ հանդիպման ժամանակ հայտարարել է, որ Սերբիան ձգտում է Եվրամիություն, սակայն եվրոպական գործընկերներին չի կարող խոստանալ այն, ինչ երբեք չի կարողանա կատարել: «Սերբիան հավատարիմ է Պրիշտինայի հետ հարաբերությունների նորմալացման ծրագրի պայմաններին, սակայն երբեք չի համաձայնի քայլի, որն այդ փաստաթղթով նախատեսված չէ, եւ երբեք չի ճանաչի Կոսովոյի անկախությունը»,- ընդգծել է նա: