Ինչպես են մարդիկ ապրում անապատում

Իտալացի կինոռեժիսոր Տոմազո Կոտրոնեն հերթական վավերագրական ֆիմն է նկարահանել, այն կոչվում է «Տարբերություն»: Հիշեցնենք, որ Կոտրոնեն 2012-ին իր «Տղամարդկանց դպրոց» վավերագրական ֆիլմով մասնակցել է «Ոսկե ծիրան»-ին:

Yerkir.am-ի հետ զրույցում Կոտրոնեն նշեց, որ ֆիլմը նկարահանել է իր փոքրիկ տեսախցիկով 2012-ին` Մավրիտանիայում:

«Այս անգամ նույնպես ֆիլմը սոցիալական խնդիրների մասին է` թե ինչպես են անապատում ապրում մարդիկ` օրերով սպասելով գնացքի գալուն, որն իր հետ ջուր եւ վառելիք է միայն բերում: Գնացքը նրանց կյանքի միակ սնուցող երակն է: Այնտեղ ծայրահեղ աղքատություն է տիրում, մարդիկ ապրում են կեղտոտ վրաններում»,- ասաց ռեժիսորը:

Կոտրենեն իր ֆիլմով առաջդրվել է «Ջիհլավա» վավերագրական ֆիլմերի միջազգային փառատոնի «Ակտուալ վավերագրական ֆիլմ» անվանակարգում: Փառատոնը կանցկացվի հոկտեմբերի 24-29-ը, այն արդեն 16 տարվա կյանք ունի եւ Արեւելյան Եվրոպայի ամենախոշոր փառատոններից  է: Փառատոնի նպատակը սոցիալական խնդիրների բարձրաձայնումն ու ցուցադրումն է, ինչպես նաեւ այլ խորքային խնդիրների վերհանումը: