Թուրքիայի տվածը` ավազահատիկ անապատում

Թուրքիայի վարչապետ Ռեջեփ Թայիփ Էրդողանը հայտարարել է, որ վերադարձնելու է ազգային փոքրամասնություններին պատկանող կալվածքները, իսկ դա արվել է ոչ թե բարի նպատակներից ելնելով, այլ Եվրադատարանի աչքը փակելու համար. այսպես է կարծում թուրքագետ Արտակ Շաքարյանը:

Նրա խոսքերով`  այն, ինչ Թուրքիան վերադարձրել է, ավազահատիկ է անապատում: «Մենք չենք խոսում 1915թ. Թուրքիայի կողմից խլված հողերի մասին, խոսքը վերաբերում է 1936-1974թթ. ապրած հայերի կալվածքներին»,-  ասաց թուրքագետը:

Իսկ թուրքագետ Հակոբ Չաքրյանը Թուրքիայի քայլը որոշ չափով համարում է գովելի: «Նախկինում հայ, հույն, հրեա համայնքներին թույլ չէին տալիս դիմել դատարան, ավելին` չէին թողնում անգամ խոսել վերադարձվող տարածքների մասին. այժմ նրանք կարող են ստանալ իրենց հողերը»,- նշեց նա:

Հարցին, թե այս գործընթացից ինչո՞ւ պետք է ոգևորվել կամ չոգևորվել, Շաքարյանը պատասխանեց, որ պետք է ոգևորվենք, քանի որ սա մեծ առաջընթաց է Հայաստանի համար: «Թուրքիան, այսօր վերադարձնելով 7-8 կալվածք, չի բացառվում, որ ապագայում կվերադարձնի հայերիս պատկանող ամբողջ հողերը, իսկ չպետք է ոգևորվենք, քանի որ Թուրքիան դա անում է աշխարհին ցույց տալու, թե որքան լավն է ինքը»,- ասաց նա:

Խոսելով արձանագրությունների մասին` թուրքագետը հայտարարեց, որ ՀՀ նախագահն ասել է` քանի դեռ Թուրքիան ոչ մի քայլ չի կատարում, մենք ԱԺ-ում կսառեցնենք քննարկումները:

«Հայ-թուրքական հարաբերության ձախողման համար աշխարհը մեղադրում է Թուրքիային, և եթե Հայաստանը հետ վերցնի ստորագրությունը, ապա ձախողման հետևանքով կրելու է նույնքան պատասխանատվություն»,- ասաց Շաքարյանը: