Կարկուտի վնասի չափերը գնահատելու համար ստեղծվել է աշխատանքային շտաբ

Աշխատանքային շաբաթը գյուղատնտեսության նախարարությունում սկսվեց հրատապ խորհրդակցությամբ` նվիրված երեկ Արմավիրի մարզում տեղացած ուժեղ կարկուտի հետևանքով ստեղծված իրավիճակի գնահատմանը, վնասի չափերը նվազագույնի հասցնելուն ուղղված օպերատիվ միջոցառումների կազմակերպմանը. հայտնում է գյուղնախարարության մամլո խոսնակ Անի Սմբատյանը:

Իրավիճակի մասին նախնական տեղեկատվությունը, ըստ նախարար Սերգո Կարապետյանի, ինքը և նախարարության պատասխանատուները ստացել են նախօրյակին, աղետից անմիջապես հետո, առավել տուժած համայնքներ այցելելու ժամանակ։

Վնասի իրական չափերի ճշգրտման գործընթացը տեղերում կազմակերպելու և մասնագիտական խորհրդատվության համար ստեղծվել էաշխատանքային շտաբ` առաջին փոխնախարար Գրիշա Բաղիյանի գլխավորությամբ։ Փոխնախարարների գլխավորած մասնագիտական խմբերը այս և հետագա օրերին, ԳԱՄԿ-երի ներկայացուցիչների ուղեկցությամբ, կլինեն տուժած տնտեսություններում և համապատասխան աջակցություն կցուցաբերեն հողօգտագործողներին առաջին անհրաժեշտության աշխատանքների կազմակերպման գործում։

Նախարարի կարգադրությամբ` այսօր կճշգրտվեն հանրապետությունում առկա սերմերի և սածիլների իրական ծավալները անհրաժեշտության դեպքում տուժած տնտեսություններին տրամադրելու համար։