Արմավիրի մարզին գումար հատկացվեց`քամու և կարկուտի հետևանքների վերացման համար

Այսօր կառավարության նիստում տարածքային կառավարման և զարգացման նախարար Դավիթ Լոքյանը ներկայացրեց որոշում` Արմավիրի մարզին գումար հատկացնելու մասին` ուժեղ կարկուտի ու քամու հետևանքների վերացման նպատակով:

Նախարարի խոսքով` Արմավիրի աղետից հետո վարչապետի, գյուղնախարարի և տարածքային կառավարման նախարարի այցի արդյունքում ձևավորվել է սույն որոշումը` առավելագույնս ուշադրություն դարձնել մարզի խնդիրներին: Ըստ այդմ` 51 միլիոն դրամ է հատկացվում, որից 3 միլիոն դրամը Փարաքար գյուղի միջնակարգ դպրոցի տանիքի վերանորոգման համար, 10 միլիոն դրամը հատկացվելու է Արտաշար գյուղին` գյուղտեխնիկա ձեռք բերելու համար:

Մյուս կետը վերաբերում է միջհամայնքային մանկապարտեզին,  երբ 3-4 գյուղից երեխաներ էին բերում այդ մանկապարտեզ, որի ծավալները չէին բավարարում: Այդ մանկապարտեզին գումար կհատկացվի վերանորոգվելու, բարեկարգվելու համար

Հետագայում կարկուտի հասցրած վնասներից խուսափելու համար անհրաժեշտ է մարզի Արգինա, Տանձուտ, Արևիկ, Եղեգնուտ և Արտաշար համայնքների համար ձեռք բերել և տեղադրել թվով 12 հակակարկտային կայանքներ՝ 36 մլն դրամով: