Սահակաշվիլին ուրախ է, որ հայտնվել է ''կոտրված ձեռքերի'' ակումբում

Վրաստանի նախագահ Միխեիլ Սահակաշվիլին խոստովանել է, որ ուրախ է հայտնվել այն քաղաքական գործիչների «ակումբում», ովքեր կոտրել են իրենց ձեռքը հեծանվային զբոսանքների ժամանակ. տեղեկացնում է Apsny.ge-ն:

ԱՄՆ պետքարտուղար Ջոն Քերիի հետ զրույցում արած այս խոստովանությունը հեռարձակվել է վրացական հեռուստաալիքներով: Քերին շնորհակալություն է հայտնել Սահակաշվիլիին, որ Վրաստանը մասնակցում է Աֆղանստանում  միջազգային խաղաղապահ առաքելությանը, եւ հավելել է, որ ավելի վաղ կհանդիպեր Վրաստանի նախագահի հետ, եթե նա ձեռքը կոտրած չլիներ: Քերին ասել է, որ ինքն էլ է ժամանակին նույն կերպ կոտրել ձեռքը: Ի պատասխան Սահակաշվիլին նշել է, որ, փաստորեն, նման պայմաններում իրենց ձեռքն են կոտրել ԱՄՆ պետքարտուղարը եւ ՆԱՏՕ-ի գլխավոր քարտուղարը: «Այնպես որ` դա լավ ակումբ է»,- հայտարարել  է նա: