Ապացույցներ, որ Քադաֆին ֆինանսավորել է Սարկոզիին

Ֆրանս-լիբանանյան գործարար Զիյադ Թաքիեդդինը անվտանգության երաշխիքներ ստանալուց դեպքում պատրաստ է ապացույցներ տրամադրել, որ Լիբիայի նախկին առաջնորդ Մուամար Քադաֆին 2007-ին ֆինանսավորել է Նիկոլա Սարկոզիի նախագահական քարոզարշավը: Այդ մասին գործարարը հայտարարել է այսօր մամուլի ասուլիսում, որը հրավիրվել է այն բանից հետո, երբ երեկ ոստիկանությունը խուզարկել է նրա փարիզյան բնակարանը. տեղեկացնում է ИТАР-ТАСС-ը:

«Խուզարկությունը տեւեց 12 ժամ, սակայն այն, ինչ նրանք փնտրում էին, այնտեղ չէր»,- հայտարարել է Թաքիեդդինը` հավելելով, որ փաստաթղթերը պահվում են 4 հոգու մոտ, ովքեր Ֆրանսիայում չեն:

Ավելի վաղ նույն գործի շրջանակներում խուզարկություն էր կատարվել նաեւ Ֆրանսիայի ներքին գործերի նախկին նախարար Կլոդ Գեանի փարիզյան գրասենյակներում:

Տեղեկատվությունը, թե Քադաֆին ֆինանսավորել է Սարկոզիին, առաջին անգամ շրջանառվեց 2011-ի մարտին, երբ Քադաֆիի որդին Euronews-ին հայտնեց, որ Լիբիայի իշխանությունները Ֆրանսիայի նախագահից պահանջում են վերադարձնել նրան տրամադրված գումարները: Սարկոզին այդ հավաստիացումները «ծիծաղելի» է որակում: