Քադաֆին պետք է հեռանա, հեռանա ընդմիշտ

Ֆրանսիայի, ԱՄՆ-ի եւ Մեծ Բրիտանիայի առաջնորդները համատեղ հոդված են հրապարակել, որում տեղեկացնում են, որ մտադիր են շարունակել Լիբիայի դեմ գործողություններն այնքան ժամանակ, քանի դեռ Մուամար Քադաֆին հրաժարական չի տվել. տեղեկացնում է ֆրանսիական Figaro թերթը:

Հոդվածը միաժամանակ լույս է տեսել բրիտանական Times, ամերիկյան International Herald Tribune եւ Washington Post, նաեւ արաբական al-Hayat թերթերում:

«Անընդունելի է, որ նա, ով փորձում էր ոչնչացնել սեփական ժողովրդին, հետագայում դեր ունենա կառավարությունում: Քանի դեռ Քադաֆին իշխանություն է, ՆԱՏՕ-ն եւ կոալիցիոն գործընկերները պետք է շարունակեն գործողությունները քաղաքացիական բնակչությանը պաշտպանելու եւ վարչակազմի վրա ճնշումը մեծացնելու համար»,- հայտարարել են ԱՄՆ նախագահ Բարաք Օբաման, Ֆրանսիայի նախագահ Նիկոլա Սարկոզին եւ Մեծ Բրիտանիայի վարչապետ Դեւիդ Քեմերոնը:

Ըստ նրանց` միայն Քադաֆիի հրաժարականից հետո կսկսվի անցումը բռնատիրությունից լայնամասշտաբ սահմանադրական գորընթացի` նոր առաջնորդների գլխավորությամբ:

«Սակայն, որպեսզի գործընթացը սկսվի, Քադաֆին պետք է հեռանա, հեռանա ընդմիշտ»,- ասվում է հոդվածում:

Այսօր, ըստ Reuters-ի, Քադաֆիի դուստրը` Աիշան, Ջամահիրիայի առաջնորդի կեցավայրի տանիքից ելույթ է ունեցել ժողովրդի առջեւ եւ հայտարարել, որ «Քադաֆիի հրաժարականի պահանջը լիբիացիներին հասցված վիրավորանք է, քանի որ Քադաֆին ոչ թե Լիբիայում է, այլ լիբիացիների սրտում»: