Թրամփը մտադիր չէ ֆինանսավորել ռազմական գործողությունները Ուկրաինայում. Օրբան

ԱՄՆ նախկին նախագահ Դոնալդ Թրամփը, ով առաջադրվելու է որպես ԱՄՆ նախագահի թեկնածու Հանրապետական ​​կուսակցությունից, եթե վերադառնա Սպիտակ տուն, չի ֆինանսավորի ռազմական գործողությունները Ուկրաինայում և միջոցներ չի հատկացնի Եվրոպայի անվտանգության համար։ Այս մասին M1 հեռուստաալիքին հայտնել է Հունգարիայի վարչապետ Վիկտոր Օրբանը, փոխանցում է ТАСС-ը։

«Եթե Դոնալդ Թրամփը նորից նախագահ դառնա, նա չի ցանկանա ֆինանսավորել եվրոպացիների անվտանգությունը և չի աջակցի, որ ԱՄՆ-ն գումար հատկացնի Ուկրաինային պատերազմ վարելու համար»,- նշել է Օրբանը:

Նրա կարծիքով, եթե ամերիկյան ֆինանսավորումը դադարեցվի, եվրոպացիները չեն կարողանա աջակցել ուկրաինական բանակին, և «այն ժամանակ այս պատերազմը կավարտվի»։ 

«Դոնալդ Թրամփը դեռ Միացյալ Նահանգների նախագահը չէ, բայց նրա կուսակցությունը ԱՄՆ օրենսդիր մարմնում խանգարում է դեմոկրատներին փող ներդնել Ուկրաինայում պատերազմի մեջ», - ասել է Օրբանը՝ հաստատելով, որ ցանկանում է, որ հանրապետական ​​հավանական թեկնածուն հաղթի նոյեմբերի ընտրություններում։

Բացի այդ, Թրամփը «չի ցանկանում ֆինանսավորել Եվրոպայի անվտանգությունը հենց եվրոպացիների փոխարեն»։

«Եթե եվրոպացիները վախենում են, ապա պետք է վճարեն  իրենց անվտանգության համար կամ ուժեղացնեն իրենց զինված ուժերը»,- ընդգծել է վարչապետը։

«Եկել է վերազինվելու ժամանակը, դուք պետք է ունենաք ձեր սեփական բանակը, ձեր սեփական պաշտպանունակությունը։ Մենք պետք է կարողանանք պաշտպանել մեր երկիրը»,- եզրափակել է Օրբանը։

Նրա կարծիքով՝ Ուկրաինայի հակամարտությունն ստիպում է նման եզրակացություններ անել։