Քադաֆին փախե՞լ է երկրից

Ժողովրդական ապստամբության 8-րդ օրը Լիբիայում արյունահեղություն է սպասվում: Ժողովուրդ ասում է, որ Բինգազի քաղաքն արդեն իր ձեռքում է եւ պատրաստվում է գրավել նաեւ մայրաքաղաքը:

Տեղեկություններ են տարածվել, որ Լիբիայի նախագահ Մուամար Քադաֆին երեկ գիշեր փախել է երկրից:

Ելույթ ունենալով Լիբիայի պետական հեռուստատեսությամբ` նրա որդին` Սեյֆուլիսլամ Քադաֆին, հայտարարել է, որ ցուցարարներին հաջողվել է զենք հայթայթել, եւ հազարավոր մարդիկ արդեն մայրաքաղաք են գալիս:

«Այս պահին Բինգազիի փողոցներում քաղաքացիների գրաված տանկերն են: Ալ Բայդայում էլ մարդիկ հրացաններ ունեն, բազմաթիվ զինապահեստներ են թալանվել,- ասել է կրտսեր Քադաֆին:- Մենք էլ զենք ունենք, բանակն էլ զենք ունի, Լիբիան քանդել կամեցողներն էլ զենք ունեն»: Նա նաեւ հայտարարել է, որ մինչեւ վերջին փամփուշտը պայքարելու է Լիբիայի համար: