Սա ուրիշ ընտրություն է. Աղվան Վարդանյան

«Հայկական ժամանակ» օրաթերթը գրում է. «Երևանի  ավագանու ընտրություններին մասնակցելու Դաշնակցության ցուցակը երեկ Կենտրոնական ընտրական հանձնաժողովին ներկայացրեց ՀՅԴ Հայաստանի ԳՄ փոխներկայացուցիչ Աղվան Վարդանյանը: Վերջինիս տրամադրությունը բարձր էր:

Վարդանյանն ասաց, որ  Դաշնակցությունն այն ուժն է, որն ունի թիմ' առողջ, մասնագետ, պրոֆեսիոնալ մարդկանց թիմ, և իր հստակ մոտեցումները' երկրի և քաղաքի կառավարման վերաբերյալ: ՀՅԴ-ն, ըստ պարոն Վարդանյանի, այս պայքարի մեջ է մտնում ոգևորված և վստահ' իր հաղթանակում:

Դաշնակցության ներկայացուցիչը պատասխանել է թերթի հարցերին:

-Պարո'ն Վարդանյան, տարբեր ընտրություններում Դաշնակցության ցուցակում մշակույթի ականավոր գործիչներ են եղել: Այս անգամ կա՞ն, թե ոչ:

-Ականավոր գործիչներ չէի ասի, որ կան: Ես կարծում եմ, որ եթե մենք կարողանայինք համախմբված ցանկ ներկայացնել և մի քանի ուժեր լինեին, այդ ժամանակ իսկապես և մշակույթի ու տարբեր ոլորտների հեղինակավոր և ճանաչված մարդիկ մեծ տեղ կունենային, քանի որ նրանք նաև համախմբման կողմնակից էին: Բայց քանի որ դա տեղի չունեցավ, մենք այդ կարգով չենք մոտեցել: Մենք բերել ենք թիմի խնդիրը և նաև տարածքում աշխատելու, իսկապես տարածքների խնդիրներին ծանոթ մարդկանց ցանկ ենք կազմել և վստահ ենք, որ կունենանք շատ ուժեղ թիմ:

-Իսկ նախագահական ընտրություններում չմասնակցելու փաստը այս ընտրություններում ՀՅԴ-ի վարկանիշի վրա դրակա՞ն, թե բացասական ազդեցություն կունենա:

-Այս անգամ ՀՅԴ-ն հավաքելու է շատ ավելի քվեներ: Նախագահական ընտրությունները բոլորովին այլ ընտրություններ են: Մենք համոզված ենք, որ ճիշտ ենք արել, որ չենք մասնակցել նախագահական ընտրություններին, և կարծում եմ, որ նաև հայտարարված արդյունքները մեր ճշգրիտ լիւնելու վկայությունն են: Սա այլ ընտրություն է: Նախագահականում մեկը ստանում է ամեն ինչ, մյուսները' ոչինչ: Սա քաղաքական ուժերի համամասնական ընտրություն է , որտեղ յուրաքանչյուր ուժ ստանում է իր բաժինը: Կրկնում եմ' այս անգամ փորձելու ենք ամեն ինչ անել, անկեղծ, ազնիվ խոսել մեր քաղաքացիների հետ և համոզել, որ այս անգամ ճիշտը դաշնակցության կողքին կանգնելն է, որովհետև մենք միշտ իրենց կողքն ենք եղել:

-Իսկ ՀՅԴ-ն ներկայացնող ավագանու անդամներն իրնց գործառույթներն իրականացնելիս ո՞ր քաղաքական ուժերի հետ պատրաստ կլինեն համագործակցելու:

-Ոչ իշխանական ուժերի հետ: