Անկապ բամբասանքներ են. Նալբանդյանն՝ իր պաշտոնանկության մասին

«Հրապարակ» թերթն այսօր գրել էր, որ, իր տեղեկություններով, ԱԳ նախարար Էդվարդ Նալբանդյանը կրկին կվերադառնա Փարիզ` որպես դեսպան, իսկ նրան կփոխարինի նախագահի աշխատակզմի ղեկավար Վիգեն Սարգսյանը: Ըստ թերթի` թեեւ Նալբանդյանի աշխատանքից գոհ են, բայց նա ինքն է ուզում լինել դեսպան, «որովհետև շատ է սիրում Փարիզը»:

Այսօր ԱԺ-ում կառավարությանն ուղղված հարցուպատասխանից հետո Yerkir.am-ը ԱԳ նախարար Էդուարդ Նալբանդյանից փորձել է ճշտել տեղեկատվության իսկությունը եւ պարզել նրա սերը Փարիզի նկատմամբ:

Ուշագրավ է, որ նախարարը բավականին լարված եւ նյարդային էր: Լսելով հարցը` նա կոշտ եւ կտրուկ հայտարարեց. «Անկապ բամբասանքներ են»:

Մեր ճշտող հարցին, թե Փարիզն, իրո՞ք, այդքան շատ է սիրում, որ ԱԳ նախարարի պաշտոնը փոխարինում է դեսպանի պաշտոնով, նախարարը  նշեց, որ հարցին արդեն պատասխանել է: Նա նաեւ այդպես էլ չմանրամասնեց, թե որն է անկապ, իսկ որը «կապով» բամբասանքը...