Լավ է մեռնել, քան ծնկի իջնել ռինգում. Արթուր Աբրահամ

Մարտի 23-ին Մագդեբուրգում (Գերմանիա) կկայանա բռնցքամարտիկ, WBO վարկածով գերմիջին քաշային կարգում աշխարհի չեմպիոն Արթուր Աբրահամի և նախկին տիտղոսակիր Ռոբերտ Շտիգլիցի ռևանշ-մենամարտը:

Երեկ` մարտի 18-ին, Մագդեբուրգում կայացած ասուլիսի ժամանակ Արթուր Աբրահամը հայտարարել է, որ այդ մենամարտից ինքն ակնկալում է հաղթանակ: «Միշտ ունեմ ներքին վստահություն, որ պետք է հաղթեմ: Ինձ համար դա է կարևորը: Լավ է մեռնել, քան ծնկի իջնել ռինգում»,- ասել է նա:

Ամեն անգամ ռինգ դուրս գալը եւ հաղթելը, Աբրահամի խոսքով, իր համար պատվի հարց է, եւ նա ամեն ինչ անում է հաղթելու համար՝ արդարացնելու իր մարզչի, իր հարազատների, ընկերների, համայն հայության եւ իր մարտարվեստի երկրպագուների սպասելիքները:

2012թ. օգոստոսի 25-ին Բեռլինում Արթուր Աբրահամն աշխարհի չեմպիոն Ռոբերտ Շտիգլիցին հաղթեց մրցավարների միաձայն որոշմամբ (116-112, 116-112, 115-113): Իսկ 2012թ. դեկտեմբերի 15-ին Նյուրնբերգում կայացած մենամարտում 32-ամյա Աբրահամը տիտղոսը պաշտպանեց` պարտության մատնելով ֆրանսիացի Մեհդի Բուադլային:

Աբրահամ-Շտիգլից մրցելույթը կցուցադրվի գերմանական ARD հեռուստաալիքով, նաեւ Հայաստանի հանրային հեռուստաընկերության ուղիղ եթերում: