Էկոնոմիկայի նախարարը թանկարժեք զուգարաններից տեղյակ չէ

2012թ. ՀՀ կառավարության կողմից գնված` 124 մլն դրամ արժողությամբ երկու կենսազուգարանները տևական ժամանակ է, ինչ չեն շահագործվում: Ստացվում է` այդքան մեծ աղմուկ բարձրացրած եւ կառավարության կողմից այնքան կարեւորված զուգարանները չեն ծառայում իրենց նպատակին:

Այսօր ԱԺ-ում էկոնոմիկայի նախարար Տիգրան Դավթյանից փորձեցինք պարզել, թե ինչո՞ւ չեն աշխատում այդ թանկարժեք զուգարանները: Նախարարի պատասխանն առավել քան ուշագրավ էր. նա հայտարարեց, որ դրանցով չի զբաղվում եւ տեղյակ չէ: Ի պատասխան մեր դիտարկմանը, որ պատասխանատուն Էկոնոմիկայի նախարարությունն է, դա փաստել է նաեւ փոխնախարար Արա Պետրոսյանը, իսկ այդ դեպքում ո՞ւմ ուղղենք հարցը, նախարարը հայտարարեց. «Չգիտեմ: Մեր նախարարությունը զբաղվում է արդյունաբերությամբ, եվրաինտեգրմամբ, ներդրումներով արտահանումով, զբոսաշրջությամբ»: Ասաց ու մտավ ԱԺ-ում կառավարության ներկայացուցիչների համար նախատեսված սենյակ, լրագրողներին էլ փորձեց խնձոր հյուրասիրել, որ ավելի բարի դառնան: Ի դեպ, լրագրողների դիտարկմանը, թե` չի՞ նեղանա, եթե գրենք, որ խնդրից տեղյակ չէ, նախարարը վստահ հայտարարեց՝ ոչ: