Րաֆֆի Հովհաննիսյանն այլեւս չի՞ կարող կառավարել մարդկանց

«Ժառանգություն» կուսակցության համակիր, բլոգեր Իզաբելլա Աբգարյանն այսօր լրագրողների հետ հանդիպման ժամանակ հայտարարեց, որ Րաֆֆի Հովհաննիսյանը գնաց ծայրահեղ քայլի՝ հացադուլի, զոհասեղանին դնելով իր կյանքը, հանուն բոլորի ապագայի: Նա ամենեւին էլ չի կարծում, որ Րաֆֆի Հովհաննիսյանին այդ քայլը հեշտությամբ է տրվել, բայց տեսնելով, որ որեւէ քայլի իշխանությունները չեն գնում, Հովհաննիսյանը երկու ընտրության առջեւ էր կանգնել՝ կա'մ պետք է դուրս գար գրոհի` վտանգելով մարդկանց կյանքը, կա'մ էլ պետք է զոհաբերեր սեփական կյանքը, եւ նա ընտրեց երկրորդ տարբերակը:

«Հիմա երկրում բարդ, կրիտիկական իրավիճակ է: Հույս ունեմ, որ իշխանությունները կընկալեն այս ամենի ողջ լրջությունը»,-հայտարարեց Աբգարյանը եւ ընդգծեց, որ եթե առաջ Րաֆֆի Հովհաննիսյանւը հանրահավաքներով էր ուղղորդում իր համակիրներին, ապա հիմա՝  իր իսկ համակիրների առջեւ օր օրի թուլանալով, այլեւս դժվար կլինի ուղղորդել մարդկանց:

Իզաբելլա Աբգարյանը չբացառեց, որ կարող է անարխիա լինել: Նա հայտարարեց, որ իշխանություններն իրենց բոլոր առաջարկները մերժել են, արձագանքել հեգնանքով, քննադատությամբ ու ծաղրով: «Եթե Մուհամեդը չի գնում սարի մոտ, սարն է գնում Մուհամեդի մոտ: Սարը շարժվել է, ժամանակը գնում է»,- նկատեց «Ժառանգության» համակիրը:

Բլոգերը համարում է, որ ՀՀԿ-ն վրեժ է լուծում ժողովրդից, որովհետեւ նրանց քվեն չի ստացել: