Գողացված ատենախոսությունները պետք է մերժվեն

Ատենախոսական խորհուրդները, որոնք հաստատում են ցածր մակարդակ ունեցող ատենախոսություններ, պետք է փակվեն. հայտարարել է Ռուսաստանի վարչապետ Դմիտրի Մեդվեդևը. հաղորդում է РИА «Новости»-ն:

Բանն այն է, որ մի շարք մասնագիտությունների գծով ատենախոսական խորհուրդներ կան, որոնք  «ուղղակի թույլատրում են սարսափելի աշխատանքների հաստատումը»: Այս խորհուրդների աչքից «վրիպում» են գրագողության տարրեր պարունակող ատենախոսություններ:

Վարչապետը խոստացել է այս թեմայով քննարկում կազմակերպել: Իսկ ավելի վաղ նա հայտարարել էր, որ ատենախոսությունները ոչ միայն հասանելի պետք է լինեն բոլորի համար, այլև հնարավորություն պետք է ստեղծել դրանց որակը որևէ ծրագրի միջոցով ստուգելու, հասկանալու համար:

Մեդվեդևը նշել է, որ այս գործընթացը պետք է սկսել նախ ատենախոսություններից, ապա անցնել մյուս գիտական աշխատանքներին: Հակառակ դեպքում` այս գործընթացը բերելու է գիտնականների անվան և գիտական աստիճանների վարկաբեկման: