Կահիրեի թանգարանից գողացված արժեքները անհնար է վաճառել

Հունվարի 29-ի գիշերը Կահիրեի թանգարանից գողացված պատմական անգին ցուցանմուշներն անհնար է վաճառել թանգարանների կամ անհատական հավաքածուների տերերի. «Ալ Արաբիա» արբանյակային հեռուստաալիքին տված հարցազրույցում հայտարարել է Եգիպտոսի հնությունների հարցերով պետնախարար Զահի Հավասը:

Կահիրեի աշխարհահռչակ թանգարանում կատարված գույքագրումից հետո պարզ է դարձել, որ անկարգությունների ժամանակ գողացվել է չափազանց արժեքավոր 8 ցուցանմուշ:

Ըստ Հավասի` դրանք այնքան հայտնի են բոլոր մասնագետներին, որ գաղտնի դուրս բերվել Եգիպտոսից կամ որեւէ այլ երկիր ներմուծվել չեն կարող:

Նրա կարծիքով` գողություն անողները չեն գիտակցել, թե ինչ արժեքավոր հնագիտական իրեր են տանում. նրանք պարզապես ոսկի են փնտրել: «Ես չեմ զարմանա, որ ցուցանմուշները շուտով հայտնաբերվեն թանգարանի մոտակայքում, նույնիսկ` հենց թանգարանում. հանցագործները, համոզվելով, որ դրանցում ոսկու քանակը չնչին է, հնարավոր է` դեն են նետել դրանք»,- ասել է պետնախարարը:

Գողացված ցուցանմուշների թվում Թութանհամոնի ոսկեզօծված փայտե արձաններն են, նաեւ Էխնաթոնի 35 սանտիմետրանոց արձանիկը: Թանգարան մուտք գործած բարբարոսները վնասել են մոտ 70 արժեքավոր ցուցանմուշներ. դրանք վերականգնվում են:

Ներկայումս գողության համար Կահիրեի թանգարան մուտք գործելու մեղադրանքով ձերբակալված է 9 մարդ: Նրանք պահվում են զինվորական բանտում: