ՀՀԿ-ում դժգոհություններ կան Երեւանի քաղաքապետ Տարոն Մարգարյանի հանդեպ

«Ժողովուրդի» տեղեկություններով` ՀՀԿ-ում դժգոհություններ կան Երեւանի քաղաքապետ Տարոն Մարգարյանի հանդեպ, ու կուսակցության ներսում բավական լուրջ կոալիցիա է ձեւավորվել:

Բանն այն է, գրում է թերթը, որ Տ. Մարգարյանին առաջիկայում եւս քաղաքապետի պաշտոնում ցանկանում են տեսնել միայն վարչապետ Տիգրան Սարգսյանը, Արմեն Աշոտյանը, Էդուարդ Շարմազանովն ու մի քանի հին ՀՀԿ-ական: Իսկ կուսակցության ներսում շատերը, այդ թվում` ԱԺ նախագահ Հովիկ Աբրահամյանը, աշխատել են ամեն գնով դեմ գնալ այդ որոշմանը:

Մարգարյանի հանդեպ բացասական վերաբերմունք ձեւավորվել է շատերի նկատմամբ նրա կողմից ցուցաբերված ոչ բարյացակամ վերաբերմունքի պատճառով. Տեղեկացնում է «Ժողովուրդը»: ՀՀԿ փոխնախագահ Գալուստ Սահակյանը, սակայն, հերքել է այս լուրերը. «Որոշում կայացնողը ՀՀԿ ԳՄ-ն է, եւ բոլորն էլ կողմ են քվեարկել այդ հարցում»:

Թերթը նկատում է, որ եթե Սերժ Սարգսյանը որոշի գնալ կտրուկ քայլերի ու պաշտոնանկ անելով, զոհաբերել որեւէ մեկին, ապա այսքանից հետո ամենահարմար թեկնածուն մնում է վարչապետը: